Read Runyoro - rutooro Zab 107 Bible Online

Zab 107 - Runyoro - rutooro bible

Zab 107

¹Musime MUKAMA habwokuba Murungi; baitu engonzi ze ezitayuga ziikaraho ebiro byona!

²Aba MUKAMA yacungwire, nukwo bagambe bati, aba yacungwire kuruga omu muhito,

³naabasorooza kuruga omunsi zoona, kuruga Burugaizooba na Bugwaizooba, kuruga omu matemba noomumasirimuka.

⁴Abandi bakahabira omwirungu nambere hakaba hatali bantu, batabone muhanda kubahikya omu rubuga rw'okwikaramu;

⁵bakarumwa enjara baakwatwa n'iroho omwoyo gwabo gwaruhirra omuli bo.

⁶Nubwo bakungire MUKAMA omu muhito gwabo, yabajuna kubaiha omu bujune bwabo,

⁷akabeebembera kubarabya omu muhanda oguterekeriire, okuhikya obu baahikire omu rubuga orw'okwikaramu.

⁸Leka basiime MUKAMA habw'engonzi ze ezitayuga, habw'emirimo ye, enyakuhuniriza abantu!

⁹Habwokuba ahaagura anyakwine iroho, n'arukurumwa enjara amwigusa n'ebintu ebirungi.

¹⁰Abamu bakaikarra omu mwirima n'omukibunda, bali banyankomo omu kubonabona n'omunjegere,

¹¹habwokuba bakaba beemiire ebigambo bya Ruhanga, baanagaija empanuura z'anyakuli haiguru Muno.

¹²Emitima yabo nikyo yabuundaliziibwe emirimo ey'amaani; baagwa hansi, bataina kikoonyera.

¹³Nubwo baaliririire MUKAMA bali omu muhito gwabo, yabajuna kuruga omu bujune bwabo;

¹⁴akabaiha omu mwirima n'ekizina, yacwacwanamu habiri enjegere zaabo.

¹⁵Leka basiime MUKAMA habw'engonzi ze ezitayuga, habw'emirimo ye, enyakuhuniriza abantu!

¹⁶Habwokuba acwacwana enyigi ez'emiringa, kandi atemamu habiri emiteehimbwa y'ebyoma.

¹⁷Abandi bakaba bali badomadoma bali omu mihanda yabo ey'ebibi, kandi habw'ebibi byabo bakabonabona;

¹⁸bakanuga ebyokulya ebya buli mulingo, bairra haihi n'amalembo ga rufu.

¹⁹Nubwo baakungire MUKAMA omu muhito gwabo, yabajuna omu bujune bwabo;

²⁰akaragira ekigambo kye, yabakiza yabajuna kuruga omu kuhwerekerra.

²¹Leka basiime MUKAMA habw'engonzi ze ezitayuga, habw'emirimo ye, enyakuhuniriza abantu!

²²Kandi kabatambe ebyonzira eby'okusiima, kandi basubirre ebikorwa bye n'ebizina eby'omuhimbo!

²³Abamu bakagoya amaato omu nyanja, nibakora eby'obusuubuzi ha maizi amaingi.

²⁴Bakarora ebikorwa bya MUKAMA, emirimo ye ey'okuhuniriza omu nziha.

²⁵Habwokuba akaragira, ekiyaga kyateera, kyamiima ebigonzi by'enyanja.

²⁶Bikatuuma byahika haiguru byagaruka hansi omu nziha; omu kabi ako, abasaija bakahwa amasiko;

²⁷bakarungurra baataratara nk'abatamiizi, n'amagezi gaabo ag'okugoya amaato batakyagaina.

²⁸Nubwo bakungire MUKAMA omu bujune bwabo, yabajuna kuruga omu muhito gwabo;

²⁹akaculeeza ihunga, n'ebigonzi by'enyanja byaculeezibwa.

³⁰Habwokuculeera oku, bakasemererwa, yabaleeta yabahikya hamwaro ogubayegombaga.

³¹Leka basiime MUKAMA habw'engonzi ze ezitayuga, habw'emirimo ye, enyakuhuniriza abaana b'abantu!

³²Kabamuhaisanize omu kitebe ky'abantu. Kandi kabamukugize omu isorrokaniro ly'abakuru.

³³Ahindura ebisaaru bifooka irungu ly'omusenyi, n'ensoro z'amaizi azifoora itaka eryomere,

³⁴ensi ey'orwezo agifoora ibuga ly'ekisura habw'obubi bw'abantu abanyakugiikaramu.

³⁵Irungu ly'omusenyi alifoora ebitungeezi by'amaizi, n'ensi y'ibuga agifoora ensoro z'amaizi.

³⁶Oku nuho aikaza abajara, beeyombekera orubuga orw'okwikaramu;

³⁷oku nuho basiga emisiri, babyara emizabbibbu, kandi batunga ebijuma bingi.

³⁸Habw'emigisa ye, bakanya muno; taikiriza ente zaabo kukeeha.

³⁹Kakuba bakeeha, bakahemurwa, habw'okugadisibwa, emihito n'amaganya,

⁴⁰abalemi abaseesaho emigayo kandi bataabataabanira omwirungu nambere hatali muhanda;

⁴¹baitu abaseege abaimukya abaiha omu kubonabona, akanyisa enganda zaabo nk'amagana g'entaama.

⁴²Abahikirrire obu barora eki, basemererwa; baitu obubi bwona bubumba akanwa kaabwo.

⁴³Weena ow'amagezi ateho omutima ebigambo binu; abantu leka bateekerezeeho engonzi za MUKAMA ezitahinduka.