Read Runyoro - rutooro Zab 109 Bible Online

Zab 109 - Runyoro - rutooro bible

Zab 109

¹Ai Ruhanga ou nkugiza, otaculeera!

²Habwokuba, ababi n'abagobya baanyesamiize akanwa, nibambazaaho kubi n'endimi ez'ebisuba.

³Banyehinguliriize ebigambo eby'enobi, banseesira hataroho eki nkonzire.

⁴Nyowe obu mbooleka engonzi, bo baambazaaho ebibi, noobu mbasabira, nabwo tikigasa.

⁵Obunkora ebirungi, bansasuramu empeera y'obubi; kandi omukiikaro ky'engonzi ezimbooleka, banyolekamu enobi.

⁶Omukomere omucwi w'emisango engobya; kandi omuserurre omuntu ow'okunyegerra.

⁷Obwalinyegererwa, naakasangwe asingirwe omusango; kandi esaara ye n'ekatwarwe nk'ekibi!

⁸Ebiro bye nibikakeehe bikaba bike; omuntu ondi, naakanyage ebintu bye!

⁹Abaana be nibakafooke nfuuzi, na mukazi we akaba nfaakati!

¹⁰Abaana be nibakaikalege nibajeerajeera nibasabiriza; omu bifurukwa nambere baikara nibakabingwemu!

¹¹Arukumutonga nibakamunyage ebyainabyo byona; ebijuma bye yahiitikaniire nibikaliibwe abanyamahanga!

¹²Hatabaho n'omu akumwoleka embabazi, rundi omuntu weena akuganyira enfuuzi ze!

¹³Abaijukuru be bahwerekerre; ibara lye lireke kuzooka omu baijukuru!

¹⁴MUKAMA aijuke obubi bw'abaisenkuru, ekibi kyanyina kireke kuganyirwa!

¹⁵MUKAMA aikalege naijuka ebibi byabo, baitu bo bonka MUKAMA abeeberwe kimu!

¹⁶Habwokuba ataijuke kugirra abandi embabazi, baitu akahondera abanaku abainazi, n'abaine omutima ogutuntwire yabaita.

¹⁷Akagonza kukondereza; omukyeno nigukamugarukire! Atagonze kusabira bandi omugisa, na uwe hatabaho noomu arukumusabira omugisa!

¹⁸Omukyeno gwamwehingulizaaga nkaanyakujwaire omwegereko, nigukamutaahe omu mubiri gwe nkaamaizi, gukasisa nk'amagita omumagufa ge!

¹⁹Nigukasisane nk'ebyokujwara ebyajwara bikamusweka weena, kandi nk'orukoba orwayeteegesa buli kiro!

²⁰Enu niyo ebe mpeera MUKAMA eyaaraaha abanyanzigwa bange, kandi yaabo abanyakubazaaho kubi obwomeezi bwange!

²¹Ai Ruhanga MUKAMA wange, habw'ibara lyawe ondwanirre, habwokuba engonzi zaawe ezitayuga, nungi, onjune!

²²Habwokuba ndi munaku kandi museege, n'omutima gwange gwijwire obujune.

²³Nimpwerra nk'ekituuru kya rwebagyo; nibansikiiriza nibambinga hoona nk'oruzige.

²⁴Habwokusiiba, amaju gange gahoirwemu amaani; omubiri gwange nagwo guhoirwemu ebisajwa.

²⁵Nkafooka ky'okusekereza hali abanyanzigwa bange; obu bandora, bahungya emitwe yabo.

²⁶Ai MUKAMA Ruhanga wange, onkoonyere! Habw'engonzi zaawe enyingi; onjune!

²⁷Ai MUKAMA abanyanzigwa bange kabamanye ngu gunu mukono gwawe; ngu iwe niiwe okikozire kunjuna!

²⁸Leka bo bakyene, baitu iwe ompe omugisa! Abanyakundamagira, kabaswazibwe; baitu nyowe omwiru waawe nsemererwe!

²⁹Abanyanzigwa bange obajweke ekihemu; bajwale ensoni zaabo nk'omwenagiro!

³⁰Akanwa kange ndikasiimisa muno MUKAMA; ndaamukugizaaga ndi omukitebe ky'abantu.

³¹Habwokuba antonganirra, omuseege amwemerra ha mukono gw'obulyo, nukwo amujune hali abo abamucwera omusango gw'okufa.