Read Runyoro - rutooro Zab 118 Bible Online

Zab 118 - Runyoro - rutooro bible

Zab 118

¹Musiime MUKAMA habwokuba murungi; engonzi ze ezitayuga ziikaraho ebiro byona!

²Isirairi agambe ati “Engonzi ze ezitayuga, ziikaraho ebiro byona.”

³Enju y'Arooni egambe eti, “Engonzi ze ezitayuga, ziikaraho ebiro byona.”

⁴Abo abanyakutiina MUKAMA bagambe bati, “Engonzi ze ezitayuga ziikaraho ebiro byona.”

⁵Obu nkaba ndi omumuhito, nkakunga MUKAMA; akanyanuukura yampa obusinge.

⁶MUKAMA obu aba andi ha rubaju, tintiina. Kandi omuntu, asobora kunkora ki?

⁷MUKAMA andi ha rubaju ankonyere; abo abanyakunnoba, ndibasingura.

⁸Okwesiga MUKAMA, kirungi okukira kwesiga omuntu.

⁹Okwesiga MUKAMA, kirungi okukira kwesiga abalemi.

¹⁰Amahanga goona gangosire; omu ibara lya MUKAMA, ninyija kugatematema!

¹¹Gakangota, bangota ha mbaju zoona; omwibara lya MUKAMA, nkagasarasara!

¹²Gakangota nk'enjoki, gamekuka nk'omurro ogw'amahwa; omwibara lya MUKAMA, nkagahuutahuuta.

¹³Nkasindikwa muno, kake konka nkaba ndi haihi kugwa, baitu MUKAMA yankwatirra.

¹⁴MUKAMA nuwe maani gange, kandi kizina kyange; afookere kujunwa kwange.

¹⁵Muhurre, omu heema z'abahikiriire harumu ebizina eby'okusemererwa “Omukono gwa MUKAMA ogw'obulyo, gukozire n'obumanzi!

¹⁶Omukono gwa MUKAMA ogw'obulyo gunyumiziibwe, omukono gwa MUKAMA ogw'obulyo gukozire n'obumanzi!”

¹⁷Tindifa, baitu ndyomeera, nukwo nsubirre ebikorwa bya MUKAMA.

¹⁸Noobu araaba anfubiire naagenderra kungorra, baitu tandekiire rufu.

¹⁹Munkingurre amalembo ag'obuhikiriire, nugo ndabemu ntaahe, nsiime MUKAMA.

²⁰Linu niryo irembo lya MUKAMA, abahikiriire nubo basobora kulirabamu.

²¹Ninkusiima habwokuba onyanukwire, kandi ofookere kujunwa kwange.

²² Ibaale abombeki eri baagayiraniize, niryo lyabaire mutwe gw'akarugu.

²³Eki, MUKAMA nikyo yakozire; itwe nitukirora nk'ekirukuhuniriza.

²⁴Kinu nikyo ekiro MUKAMA eki akomere; tukikyanganukireho kandi tukisemererweeho.

²⁵Ai MUKAMA, tukwesengeriize otujune! Ai MUKAMA, tukwesengeriize, otuhe omugisa!

²⁶W'omugisa ogu ow'arukwija omwibara lya MUKAMA, nitubasabira omugisa, tuli omunju ya MUKAMA,

²⁷MUKAMA nuwe Ruhanga, kandi nuwe yatuhaire ekyeererezi, muteere omusorongo, mukwasire amataagi, muhike ha mahembe g'itambiro!

²⁸Niiwe Ruhanga wange, ndaakusiimaga; niiwe Ruhanga wange, ndaakunyumizaaga.

²⁹Musiime MUKAMA, habwokuba murungi; habwokuba engonzi ze ezitayuga ziikaraho ebiro n'ebiro.