Read Runyoro - rutooro Zab 119 Bible Online

Zab 119 - Runyoro - rutooro bible

Zab 119

¹B'omugisa abo abatakora kabi, abanyakugendera ha biragiro bya MUKAMA!

²Ka bahiirwa abo abanyakukwata ebiragiro bye,

³abanyakumuserra n'omutima gwabo gwona, abatakora kabi na kamu, kandi abanyakukwata emihanda ye!

⁴Niiwe waragiire, ebiragiro byawe kukwatirwa kimu n'obwekambi.

⁵Haa boojo, kakuba mbaire ninsobora kugumira omu muhanda ogw'okukwata ebiragiro byawe!

⁶Obu ndiba mpangire amaiso ha biragiro byawe, nubwo ntaliswazibwa.

⁷Obu ndyega ebigambo byawe eby'obuhikiriire, nubwo ndikukugiza n'omutima ogutereekeriire.

⁸Mmaliriire kukwata ebiragiro byawe; otalinnaga ebiro byona

⁹Omusigazi, asobora ata, kwikara naakora ebirungi? Eki akikora, naahikiriza ekigambo kyawe ekikigamba.

¹⁰Ninkuserra n'omutima gwange gwona; otalinyikiriza kujeerajeera nkaruga ha biragiro byawe!

¹¹Ekigambo kyawe nkakyahura omu mutima gwange, nukwo ndeke kukusiisira.

¹²Ai MUKAMA okugizibwe; onyegese Ebiragiro byawe!

¹³Ebigambo byawe byona ebi wagambire mbitebya n'akanwa kange.

¹⁴Omu muhanda ogw'okukwata ebiragiro byawe, nuho nsemerererwa, omuhimbo ogukirra hara itungo lyona.

¹⁵Ndaayegambirraga ha biragiro byawe, kandi nte amaiso ha mihanda yaawe.

¹⁶Omuhimbo gwange guli omu kukwata ebiragiro byawe, tinyebwege kigambo kyawe.

¹⁷Nkorra ebirungi bingi nukwo nyomeere kandi nkwate ebiragiro byawe.

¹⁸Onyigule amaiso, nukwo mpweze ebintu ebihuniriza ebinyakuruga omubiragiro byawe.

¹⁹Omunsi enu ndi mugonyi; otansereka ebiragiro byawe!

²⁰Obwire bwona nyamusana n'ekiro, habw'ebigambo byawe, omwoyo gwange gumazirweho ekihika.

²¹Niiwe ohana abanyamyehembo abaakyenerwe, abanyakuruga ha biragiro byawe,

²²onyiheho ebijumo n'emigayo yabo, habwokuba nkwata ebiragiro byawe.

²³Abalemi noobu baraikarra bakacika kunyigiriza nyowe omuheereza wawe ndaateekerezahoga ebiragiro byawe.

²⁴Ebiwamanyisize nugwo omuhimbo gwange, nibyo bimpabura.

²⁵Omwoyo gwange guhamiire omu cuucu; ompumbuule nkooku wagambire!

²⁶Obu nakutebiize ha ngeso zange okangarukamu; onyegese ebiragiro byange!

²⁷Onkengese nkooku ndakwata ebiragiro byawe, nukwo nyecumiitirize ha mirimo yawe enyakuhuniriza.

²⁸Obwomeezi bwange nibuhwerekerra habwokuganya; ongumye nkooku waraganiize.

²⁹Oncwemu engeso ez'ebisuba; kandi onyegese n'embabazi ebiragiro byawe!

³⁰Nkakoma omuhanda ogw'obwesige, ebiragiro byawe, nibyo ndukwikazaaho amaiso

³¹Ai MUKAMA, ngumira ha Biragiro byawe; otaikiriza nkaswazibwa.

³²Obu olinyongera obwetegereza, ndaagenderaga omu muhanda ogw'ebiragiro byawe!

³³Ai MUKAMA, onyegese omuhanda ogw'ebiragiro byawe; nukwo ngukwatire kimu okuhika ha mpero.

³⁴Ompe amagezi nukwo mpondere ebiragiro byawe, kandi mbikwatire kimu n'omutima gwange gwona.

³⁵Ondabye omu muhanda ogw'ebiragiro byawe, habwokuba eki, nugwo omuhiimbo gwange.

³⁶Ompe okugonza muno ebiragiro byawe, okukira kutunga amagoba!

³⁷Ontange kuta omutima ha bintu ebitanyina mugaso; onyomeeze n'ekigambo kyawe.

³⁸Ohikirize eki waraganiize, hali nyowe omwiru wawe eki waraganiize abo abanyakukutiina.

³⁹Onjune ebijumo ebi ndukutiina; habwokuba ebiragiro byawe birungi.

⁴⁰Orole nkooku ndukwegomba muno ebiragiro byawe; onyomeeze habw'obuhikiriire bwawe!

⁴¹Ai MUKAMA, engonzi zawe katayuga zimpikeho, nkooku waraganiize, mpikweho okujuna kwawe; Ai MUKAMA, onyooleke nkooku ongonza muno, kandi onjune nkooku waraganiize;

⁴²obu nubwo ndisobora kugarukamu abo abanyakunjuma, habwokuba, nyesiga ekigambo kyawe.

⁴³Otalinyihira kimu omukanwa ekigambo eky'amazima, habwokuba obunihizi bwange buli omu biragiro byawe.

⁴⁴Obutoosa ndaakwataga ebiragiro byawe, ebiro n'ebiro;

⁴⁵Nubwo ndiikara n'obusinge, habwokuba nkaserra ebiragiro byawe.

⁴⁶Ndirangirra abakama ebiragiro byawe ntarukutiina kuswara

⁴⁷habwokuba omubiragiro byawe ebingonza, nuho nsanga omuhimbo.

⁴⁸Ebiragiro byawe ebingonza, mbitamu ekitiinisa, kandi nyecumiitiriza ebigambo byawe.

⁴⁹Oijukege ekigambo kyawe eki wagambiire nyowe omwiru wawe eki wanyegeseze kutamuga obunihizi.

⁵⁰Obu mba omu muhito, kinu nikyo kimpuumuza, habwokuba okaraganiza kunyomeeza.

⁵¹Abantu ababi abatatiina Ruhanga bakansekeereza muno, baitu nyowe tinduga ha biragiro byawe.

⁵²Ai MUKAMA, obunteekereza ha biragiro byawe ebya ira na ira, mpuumuzibwa.

⁵³Obu ndora abantu ababi nibarugaho ebiragiro byawe, ekiniga kirarra kumbarura.

⁵⁴Hoona nambere nyikara Ebiragiro byawe nikyo kizina kyange.

⁵⁵Ai MUKAMA, omu bwire bw'ekiro, nyijuka ibara lyawe, nubwo nkwata ebiragiro byawe.

⁵⁶Omugisa ogu gukatungwa nyowe, nikyo nakwatiire ebiragiro byawe.

⁵⁷MUKAMA nuwe Mugabo gwange, nindaganiza kukwataga ebigambo byawe.

⁵⁸Nkwesengeriize n'omutima gwange gwona; ongirre embabazi, nkooku waraganiize.

⁵⁹Obu nteekereza ha ngeso zange, ngaruka ngumira ha bigambo byawe,

⁶⁰ndahuka, timbandaara kukwata ebiragiro byawe.

⁶¹Emiguha ey'ababi noobu entuuka, tinyebwa biragiro byawe.

⁶²Habw'ebiragiro byawe ebihikiriire, ekiro omu itumbi, nyimuka nkukugiza.

⁶³Mba nganjani y'abo boona abanyakukutiina, kandi abanyakukwata ebiragiro byawe.

⁶⁴Ai MUKAMA, ensi yoona ijwiire engonzi zawe katayuga; onyegese ebiragiro byawe!

⁶⁵Ai MUKAMA, nkooku wagambire, omwiru wawe okamukora kurungi.

⁶⁶Onyegese encwa n'amagezi amarungi, habwokuba nyikiriza ebiragiro byawe.

⁶⁷Obu nkaba ntakabonabonesiibwe nkahaba; baitu hati, ninkwata ekigambo kyawe.

⁶⁸Iwe omurungi kandi omunyambabazi ati, onyegese ebiragiro byawe!

⁶⁹Ab'emyehembo noobu barampangirra muno baitu nyowe ninkwata ebiragiro byawe, n'omutima gwange gwona.

⁷⁰Emitima yabo ekwasire poo nk'ebisajwa, baitu nyowe omuhimbo gwange, gusigikira omubiragiro byawe.

⁷¹Kikansemerra kusaalizibwa, nukwo nsobole kwega ebiragiro byawe.

⁷²Ebiragiro ebi wataireho, nimbikiza ezaabbu n'efeeza ey'omunsi yoona

⁷³Emikono yawe niyo yankozire kandi niyo yambumbire; ompe amagezi, nukwo nyege ebiragiro byawe.

⁷⁴Abo abanyakukutiina, balindora bakyanganuke, habwokuba, nyesiguza ekigambo kyawe.

⁷⁵Ai MUKAMA, mmanyire emicwere yaawe nkooku eri y'obulyo, kandi nkooku wansaalize omu bwinganiza. Noobu oraaba wanfubiire, baitu hali nyowe, oikara oli mwesigwa.

⁷⁶Nkooku waraganiize nyowe omwiru wawe engonzi zawe ezitayuga, ziikalege zeeteekaniize kumpuumuza.

⁷⁷Onganyire nukwo nyomeere; habwokuba ebiragiro byawe nugwo omuhimbo gwange.

⁷⁸Oswaze ab'emyehembo, habwokuba bankora kubi nibancwa ebisuba; baitu nyowe, ndayecumitirizaaga ebiragiro byawe.

⁷⁹Abo boona abanyakukutiina baije hali nyowe, abo boona abanyakumanyire ebiragiro byawe!

⁸⁰Onsoboze kuta omutima gwange gwona ha biragiro byawe, nukwo ndeke kuswazibwa.

⁸¹Omwoyo gwange gwina ekihika, nigugonza ogujune; nnihira omu kigambo kyawe.

⁸²Amaiso gange gahimbaire habw'okwikara gategeriize kurora eki waraganiize, ninyekaguza nti, “Olimpuumuza di?”

⁸³Habwokuba, ninsisana nk'endyanga enyakuli omumwika, baitu nabwo, nteebwe biragiro byawe.

⁸⁴Nyowe omwiru wawe, ndigumiisiriza kuhika di? Abo abanyakumpiiganiza, olibacwera di omusango?

⁸⁵Abantu ababi entafaaho Ruhanga abatahondera biragiro byawe, bakandimira amahya.

⁸⁶Ebiragiro byawe byona, by'amananu; abantu ababi nibampiiganiza, nibampangirra; iwe onjune! Iwe onkonyere.

⁸⁷Ensi, kutagirwa baginyihiremu; baitu ebiragiro byawe ntabirugeho.

⁸⁸Habw'engonzi zawe ezitayuga, obwomeezi bwange, nukwo nkwate ebiragiro byawe byona

⁸⁹Ai MUKAMA, ekigambo kyawe kikagumira kimu omwiguru.

⁹⁰Obwesige bwawe bwikaraho ebiro byona, okasimba ensi kandi tetengeeta.

⁹¹Okuhika na ha kiro kinu, ebintu biri nkooku wategekere; habwokuba byona biba baheereza bawe. Ebiragiro byona, birindwa encwamu yawe, habwokuba ebintu byona, baheereza bawe. Habwokuba ebintu byona niiwe biheereza.

⁹²Ebiragiro byawe kakuba bitarabaire muhimbo gwange, emihito yange yaakubaire enyisire.

⁹³Ebiro byona, tindyebwa biragiro byawe, habwokuba, nibyo wampeeriiremu obwomeezi.

⁹⁴Ndi wawe, onjune; habwokuba, nkaserra ebiragiro byawe.

⁹⁵Ababi baikara baanyeserekeriire baanyite; baitu nyowe, nyikara ntaire omutima ha biragiro byawe.

⁹⁶Nkarora empero ey'obuhikiriire bwona, baitu ebiragiro byawe, tibigira mutaano.

⁹⁷Dara, ngonza muno Ebiragiro byawe! Okwiza obwire, nibyo nsiiba ninyecumiitiriza,

⁹⁸Ekiragiro kyawe habw'okwikara nakyo ebiro byona, kinfoora munyamagezi okukira abanyanzigwa bange.

⁹⁹Ninyetegereza muno okukira abeegesa bange boona, habwokuba, ebiragiro byawe, nibyo nyikara ninyecumiitiriza.

¹⁰⁰Ninkenga muno okukira abantu abakuru, habwokuba nkwata ebiragiro byawe.

¹⁰¹Nyehinya ndeke kutoma omuhanda omubi gwona, nukwo nkwate ekigambo kyawe.

¹⁰²Tinyehugura biragiro byawe, habwokuba iwe wenka, niiwe wabinyegeseze.

¹⁰³Ebigambo byawe, ka birungi, biinuurra okukira obwoki!

¹⁰⁴Ebiragiro byawe nibyo bimpa amagezi; nikyo ndukunobera omuhanda ogw'ebisuba gwona.

¹⁰⁵Ekigambo kyawe, niyo etaara enyakummulikira h'okurubata, kandi nikyo kyererezi ekinyakunyoleka omuhanda.

¹⁰⁶Nkarahira kandi nkagumya eki narahiriire, ndakwataga ebiragiro byawe ebihikiriire.

¹⁰⁷Ai MUKAMA, nimbonabonesibwa muno; ompe obwomeezi nkooku wagambire.

¹⁰⁸Ai MUKAMA, oikirize ebihongwa byange eby'okukukugiza, kandi onyegese ebiragiro byawe.

¹⁰⁹Obutoosa, nyikara nkwasire obwomeezi bwange, baitu tinyebwa biragiro byawe.

¹¹⁰Ababi bakantega omutego, baitu tindugaho biragiro byawe.

¹¹¹Ebiro byona, ebiragiro byawe, nubwo obugwetwa bwange; ego nugwo muhimbo gw'omutima gwange.

¹¹²Ebiro byona okuhika hampero, mmaliriire omu mutima gwange kukwata ebiragiro byawe.

¹¹³Nnoba abantu abagobya, baitu ngonza ebiragiro byawe.

¹¹⁴Niiwe bwirukiro kandi ngabu yange; nnihira nkooku olihikiriza ekigambo kyawe.

¹¹⁵Mundugeho inywe enkozi z'ebibi, nukwo nkwate ebiragiro bya Ruhanga wange,

¹¹⁶Onkwatirre nkooku waraganiize, nukwo nyomeere otalimbuzaaho eki nanihiire!

¹¹⁷Onkwatirre nukwo mbe n'obusinge, obutoosa nte omutima ha biragiro byawe!

¹¹⁸Oyanga boona abanyakuruga ha biragiro byawe; ego, obukurungutaniza bwabo bukaba bwa busa.

¹¹⁹Ababi boona ab'omunsi, obarora nk'efakalimba; nyowe, nukwo kugonza ebiragiro byawe.

¹²⁰Habw'okukutiina, omubiri gwange nigwekanga, kandi ninkutiina kuncwera omusango.

¹²¹Nkakora eby'obwinganiza kandi eby'obulyo; otandekera abo abarukumbonabonesa.

¹²²Onyemere, nyowe omwiru wawe nukwo ntunge obusinge; otaliikiriza ababi kumbonabonesa.

¹²³Amaiso gange gajwahire habw'okwikara gategeriize okujuna kwawe, n'okuhikiriza endagaano yawe erukwera.

¹²⁴Nyowe omwiru wawe, onkorre noosigikira ha ngonzi zawe katayuga, kandi onyegese ebiragiro byawe.

¹²⁵Ndi mwiru wawe; ompe amagezi, nukwo mmanye ebiragiro byawe.

¹²⁶Akasumi kahikire, MUKAMA akole habwokuba ebiragiro byawe bicwirwe.

¹²⁷Baitu nyowe ningonza ebiragiro byawe, okukira ezaabbu, ezaabbu erukukirra kimu oburungi.

¹²⁸Nikyo ndaagenderaga ha biragiro byawe byona; nnobiire kimu omuhanda gwona ogw'ebisuba.

¹²⁹Ebiragiro byawe bihuniriza, nikyo ndukubikwatira n'okusemererwa n'omutima gwange gwona.

¹³⁰Okusuukura ebigambo byawe, kumulika kuleetera endoma obwetegereza.

¹³¹Nyesamya akanwa kange nimpiija, habwokuba nyegomba ebiragiro byawe.

¹³²Nkooku okorra abo abanyakugonza ibara lyawe, ompindukire kandi ongirre embabazi.

¹³³Nkooku waraganiize, ongumye ndeke kugwa, kandi otalinyikiriza nkasingurwa obubi.

¹³⁴Onjune okutuntuzibwa abantu, nukwo nkwate ebiragiro byawe.

¹³⁵Amaiso gawe ogaakize hali nyowe omwiru wawe, kandi onyegese ebiragiro byawe.

¹³⁶Amaiso gange nigafukumura obwambu bw'amaizi, habwokuba abantu, tibarukukwata biragiro byawe.

¹³⁷Ai MUKAMA, oli muhikiriire, kandi emicwere yawe ey'emisango y'obwinganiza.

¹³⁸Okataho ebiragiro eby'obuhikiriire kandi eby'obwesige mali mali.

¹³⁹Ihali liraaliire kunyita, habwokuba abazigu bange beebwa ebiragiro byawe.

¹⁴⁰Eki waraganiize, ky'amananu mali mali, kandi nyowe omwiru wawe, ninkigonza.

¹⁴¹Noobu ndaaba ndi muke kandi ningaywa, baitu nabwo tinyebwa biragiro byawe.

¹⁴²Obuhikiriire bwawe, buhikiriire bw'ebiro n'ebiro, kandi Ebiragiro byawe nugo amananu.

¹⁴³Omuhito n'obusaalizi noobu biraaba byampikireho, baitu ebiragiro byawe, nugwo omuhimbo gwange.

¹⁴⁴Ebiragiro byawe, biikara bihikiriire ebiro byona; ompe obwetegereza nukwo nyomeere.

¹⁴⁵Ai MUKAMA, ninyamirra n'omutima gwange gwona; ongarukemu, nukwo nkwate ebiragiro byawe. Ai MUKAMA, ninkukunga n'omutima gwange gwona.

¹⁴⁶Niiwe ndukulirirra; onjune nukwo nkwate ebiragiro byawe.

¹⁴⁷Emamba etakasazire, nyowe nyimuka ntandika kukukunga onkonyere; nkategereza ebigambo byawe.

¹⁴⁸Obwire bw'ekiro bwona, nyikara nindora nukwo nyecumiitirize hali ebi waraganiize.

¹⁴⁹Ai MUKAMA, habw'engonzi zawe ezitayuga, ompulirize habw'obuhiikiriire bwawe, ojune obwomeezi bwange.

¹⁵⁰Abanyakumpiganiza embura mbabazi, nibairra haihi, bamaliriire kunkora akabi; ebiragiro byawe tibabiroho.

¹⁵¹Ai MUKAMA, baitu niiwe oli haihi muno kukiraho, kandi ebiragiro byawe byona by'amananu.

¹⁵²Okuruga ira, nkegesibwa ebiragiro byawe nkooku wabitaireho biikaleho ebiro n'ebiro.

¹⁵³Orole omuhito gwange, kandi onjune; habwokuba tinyebwa biragiro byawe.

¹⁵⁴Ontonganirre kandi oncungule; ompe obwomeezi nkooku waraganiize!

¹⁵⁵Ababi tibalijunwa habwokuba tibakwata biragiro byawe.

¹⁵⁶Ai MUKAMA, okuganyira kwawe tikugambwa habw'obwinganiza bwawe, ompe obwomeezi.

¹⁵⁷Abahiiganiza kandi abazigu bange baingi, baitu tinduga ha biragiro byawe.

¹⁵⁸Abantu entahurra, mbarora nimbanuga, habwokuba tibakwata biragiro byawe.

¹⁵⁹Ai MUKAMA, orole nkooku ngonza ebiragiro byawe, habw'engonzi zawe ezitayuga, olinde obwomeezi bwange.

¹⁶⁰Obwesige, nugwo omutima ogw'ekigambo kyawe; ebiragiro byawe ebihikiriire, biikaraho ebiro byona.

¹⁶¹Abantu ab'obusobozi bampiiganiza hataroho bulyo, baitu ntamu ekitiinisa ebiragiro byawe.

¹⁶²Nk'omuntu anyakuzoora ituungo lingi, oku akyanganuka, na nyowe nukwo nkyanganurwa eki waraganiize!

¹⁶³Nnoba kandi nuuga ebisuba, baitu ekingonza, nibyo ebiragiro byawe.

¹⁶⁴Habw'ebiragiro byawe ebihikiriire, nkukugiza emirundi musanju.

¹⁶⁵Abo abanyakugonza ebiragiro byawe, banyina obusinge obutagambwa; busaho kintu na kimu ekibeesitaza bakatabaijuka.

¹⁶⁶Ai MUKAMA, nyesiguza kujuna kwawe, kandi nkora ebiragiro byawe eki biragira kandi mpikiriza ebiragiro byawe.

¹⁶⁷Omwoyo gwange nguta ha biragiro byawe; kandi mbigonza muno muno.

¹⁶⁸Nkwata ebiragiro n'ebigambo byawe, orora byona ebi nkora.

¹⁶⁹Ai MUKAMA, ohurre omukungo gwange nkooku wagambire, ompe obwetegereza.

¹⁷⁰Ohurre okwesengereza kwange, onjune nkooku wagambire.

¹⁷¹Akanwa kange karaakuhaisaaga habwokuba okanyegesa ebiragiro byawe.

¹⁷²Orulimi rwange ruraazinaga ha kigambo kyawe, habwokuba ebiragiro byawe byona, bihikiriire.

¹⁷³Omukono gwawe gweteekaniize kunkonyera, habwokuba nkakoma ebiragiro byawe.

¹⁷⁴Ai MUKAMA, nyitanira okujuna kwawe, kandi ebiragiro byawe, nugwo omuhimbo gwange.

¹⁷⁵Ondeke nyomeere nukwo nkuhaisanize, kandi ebiragiro byawe binkonyerege.

¹⁷⁶Ninjeerajeera nk'entaama eyabuzire, oije onserre, nyowe omwiru wawe, habwokuba tinyebwa biragiro byawe.