Read Runyoro - rutooro Zab 132 Bible Online

Zab 132 - Runyoro - rutooro bible

Zab 132

¹Ai MUKAMA oijuke n'embabazi emihito ei yabonaboine,

²nkooku yayebugire hali MUKAMA yarahira hali Yakobbo naagamba ati:

³“Tinditaaha omukikaali kyange rundi kubyama omukitabu kyange;

⁴Amaiso gange tindigaikiriza kugwijagira rundi ebikohi byange kuhungira,

⁵okuhikya obundikazoorra MUKAMA ekiikaro, Emanzi ya Yakobbo nambere aliikara.”

⁶Dora, tukagihurraho eri omu Efuraate tukaizoora omubisaka bya Yaara

⁷“Katugende omukiikaro kye nambere aikara; turamize hansi y'akatebe k'ebigere bye!”

⁸Ai MUKAMA, imuka ogende omukiikaro kyawe eky'okuhumurramu, iwe n'esanduuko ey'amaani gaawe.

⁹Ba nyakatagara bawe bajwalege okuhikirra, kandi n'abarukwera baawe baamuze n'omuhimbo.

¹⁰Habw'omwiru waawe Daudi, otahindura amaiso gaawe okagaiha hali ogu ou wasiigire amagita.

¹¹MUKAMA akarahirra Daudi ekirahiro eky'amazima ekyatalisobora kuhindura naagamba ati: “Omu ha batabani baawe boonyini ndimuta ha kitebe kyawe eky'obukama.

¹²Abatabani baawe obu baliriinda endagaano yange n'ebigambo byange ebindibeegesa, batabani baabo na bo baliikarra ha kitebe kyawe ebiro byona.”

¹³Habwokuba MUKAMA akeekomeramu Siyoni; yakyegombooza nikyo aikalemuga;

¹⁴“Kinu nikyo ekiikaro ndaahumurramuga ebiro byona; habwokuba nkyegomboize, nuho ndaikaraga.

¹⁵Ndakanyisaaga ebirimwa byayo; abanaku baayo ndabaigusaaga ebyokulya.

¹⁶Baanyakatagara baayo ndabajwekaga okujunwa, abarukwera baayo baraazinaga batoke n'omuhimbo.

¹⁷Obu nuho ndikununuurra Daudi ihembe; nteekanirize etaara omuseeswaho magita wange.

¹⁸Abanyanzigwa be ndaabakwasaaga ensoni, baitu obukama bwe buraikaraga n'omugisa, nibugaliha.”