Read Runyoro - rutooro Zab 139 Bible Online

Zab 139 - Runyoro - rutooro bible

Zab 139

¹Ai MUKAMA, okanyekebiija muno okaamanya!

²Omanya obu mba nyikaliire kandi noobu nyimuka; oyetegereza kara ebiteekerezo byange nkyali hara.

³Oseruliriza omuhanda gwange n'obu mbyama hansi, emihanda yange yoona ogimanyira kimu.

⁴Ai MUKAMA, noobu mba ntakabalize, dora iwe oba omanyire byona ebi ndaabaza.

⁵Onyehinguliriza enyuma n'omumaiso, kandi ontaho omukono gwawe.

⁶Okumanya kwawe nikundema kukwetegereza; tindukusobora kukuhikaho.

⁷Ndagenda nkaha kukwesereka? Rundi iwe wenka ninsobora nta kukwirukaho?

⁸Obu nyara ekitabu kyange owa Nyabuyonga, oku naho ninkusangayo!

⁹Kuba mparruka nkagenda hara Burugaizooba nkaikara omu bicweka ebya hara muno omu nyanja,

¹⁰okuna ho olinyebembera, n'omukono gwawe ogw'obulyo gulinkwatiirra,

¹¹Kakuba ngamba nti: “Omwirima ka gunsereke rundi ekyererezi ekinyakunyehinguliriize kibe kiro,”

¹²nabwo omwirima hali iwe tiguba nk'omwirima, ekiro kihweza nka nyamusana; hali iwe omwirima nikyo kimu nk'ekyererezi.

¹³Ebicweka byange byona eby'omunda niiwe wabikozire, niiwe wantondekeseze ndi omunda ya mau.

¹⁴Habwokuba oli w'okutiinwa kandi w'okuhuniriza, ninkuhaisaniza. Emirimo yaawe neehuniriza! Nyowe noomanyira kimu kuruga ha kasoke kuhika ha kigere kirubata;

¹⁵engingo zange zoona itakuserekwe, obu nkaba nimpangwa omu nsita, nimbumbwa n'amagezi maingi omu nziha z'itaka.

¹⁶Amaiso gaawe gakarora byona ebi nakozirwemu; byona kimu kimu bikahandiikwa omu kitabu kyawe, ebiro byona ebi nabaliririirwe obu hakaba hatakabaireho na kimu hali byo.

¹⁷Ai Ruhanga, ebiteekerezo byawe ka by'omuhendo hali nyowe! Kubiteeraniza hamu nibihingurana ensaro!

¹⁸Kakuba nimbibara, nibikira omusenyi obwingi. Obu nsiisimuka bwona nsanga nkyali na iwe.

¹⁹Ai Ruhanga kyakunsemiize kuba oita ababi abantu abagonza kuseesa esagama bakandugaho.

²⁰Abantu abanyakukubazaaho kubi, nibakujuma abanyakubazaaho ibara lyawe ebibihire byonka!

²¹Ai MUKAMA, nyowe tinnoba abanyakukunoba? Kandi tiinuga abo boona abanyakukwemera?

²²Mbanobera kimu omulingo omubi; boona bafooka banyanzigwa bange.

²³Ai Ruhanga, onyekebiije, kandi omanye omutima gwange! Ondeengese kandi omanye ebiteekerezo byange!

²⁴Oyetegereze obu haraaba harumu obubi bwona, Onyebembere ompikye omu muhanda ogw'ebiro n'ebiro.