Read Runyoro - rutooro Zab 147 Bible Online

Zab 147 - Runyoro - rutooro bible

Zab 147

¹Mukugize MUKAMA! Habwokuba kirungi kuzinira Ruhanga waitu eby'okumukugiza; aba w'embabazi, asemeriire kuzinirwa ekizina ky'okumukugiza.

²MUKAMA naayombeka buhyaka orubuga Yerusaalemu; naasorooza Isirairi eyanagaizirwe.

³Atambira emitima y'abo abaine obujune abasemba ebihuta byabo.

⁴Abara omuhendo gw'enyunyuuzi, buli emu agiruka ibara.

⁵Ruhanga waitu Mukuru, aine obusobozi obunyakuhinguraine, n'okwetegereza kwe tikurukusobora kulengwa.

⁶MUKAMA amatura abarubaatiriirwe hansi ababi abahuura hansi.

⁷Muzinire MUKAMA nimumusiima; mumuzinire ebizina ebirungi nimuteera endongo!

⁸Asweka iguru n'ebicu, ensi agiteekaniriza enjura, ameza obunyansi ha nsozi.

⁹Enyamaiswa aziha ebyokulya byazo; ebyana by'ebingoora obu bimuliriirra n'abyo abigabira.

¹⁰Tasemerererwa amaani g'embaraasi z'obulemu, noobwakubaire amaguru g'abantu abarwani tagagiramu muhimbo;

¹¹MUKAMA asemerererwa abo abamutamu ekitiinisa, n'abo abanihira engonzi ezitayuga.

¹²Iwe Yerusaalemu, kugiza MUKAMA, na iwe Siyoni kugiza Ruhanga waawe!

¹³Habwokuba nuwe agumya emiteehimbwa y'amalembo ganyu; abaana baanyu nuwe abaha omugisa.

¹⁴Emitaano yaanyu nuwe agireetera obusinge; nuwe abaigusa n'engano erukukirra kimu oburungi.

¹⁵Atuma ekiragiro kye omunsi hansi, kyona ekyaragira kikorwa ahonaaho.

¹⁶Ebirika abyanjara nk'ebyoya by'entaama; orubaale aruraraangya nk'iju.

¹⁷Ebirika ebikwasire abinaganaga nk'oburagalika; n'oha asobora kwemera obutiti bwe?

¹⁸Aragira ekigambo kye, ebirika bye; omuyaga gwe aguragira guhuguta n'amaizi agaragira gagera.

¹⁹Yakobbo amuragira ekigambo, na Isirairi amuteeraho ebiragiro kandi amuhabura.

²⁰Amahanga agandi atagakole ati, tigamanyire biragiro bye. Mukugize MUKAMA!