Read Runyoro - rutooro Zab 148 Bible Online

Zab 148 - Runyoro - rutooro bible

Zab 148

¹Mukugize MUKAMA! Mweme omwiguru mumukugize, mumukugize omu biikaro ebiraihire!

²Inywe abamalaika be boona mumukugize, mumukugize inywe amahe ge ag'omwiguru! Inywe izooba n'okwezi mumukugize;

³inywe enyunyuuzi ezirukwangasana mumukugize!

⁴Iwe iguru eriri haiguru muno omukugize, na iwe amaizi agali haruguru y'iguru!

⁵Byona kabikugize ibara lya MUKAMA! Habwokuba nuwe yaragiire byahangwa.

⁶Habw'ekiragiro kye akabigumya omubiikaro byabyo ebiro n'ebiro akabiteeraho emitaano eyetasobora kugurukwa.

⁷Mweme hansi mukugize MUKAMA, inywe ebisoro by'omu maizi n'enziha z'enyanja,

⁸omurro n'orubaale, ebirika n'orume orukwasire, ekiyaga k'ihunga kuhikiriza ekiragiro kye!

⁹Mumukugize inywe ensozi n'obusozi n'emikogoto y'ebijuma y'emiti!

¹⁰Enyamaiswa n'ente zoona ebintu ebinyakwekurra n'ebinyonyi ebinyakuharruka!

¹¹Mumukugize abakama ab'ensi n'abantu boona, abakuru n'abalemi aba hansi!

¹²Abasigazi n'abaisiki, abasaija bakuru n'abaana!

¹³Ebintu byona kabikugize ibara lya MUKAMA, ibara lye lyonka niryo linyumizibwe; ekitiinisa kye kiri haiguru y'ensi n'iguru.

¹⁴Ihanga lye akalifoora ly'amaani, yaha abarukwera be kukugizibwa, abantu ba Isirairi abamwikara haihi. Mukugize MUKAMA!