Read Runyoro - rutooro Zab 17 Bible Online

Zab 17 - Runyoro - rutooro bible

Zab 17

¹Ai MUKAMA, ohurre ebigambo byange eby'obulyo; otege okutu ohurre omukungo gwange! Ohurre okusaba kwange, okurukuruga omukanwa akataina bugobya.

²Niwe oncwere omusango! Amaiso gawe garole ekihikire!

³Kakuba oyekebiija omutima gwange, okambungira omubwire bw'ekiro, kakuba ondenga, noija kunsanga ntaina kabi; akanwa kange tikasiisa.

⁴Ha mirimo enyakukorwa abantu, nkafuuhya engeso ez'abahoogozi, ninyekonyeza ekigambo ekyakanwa kange.

⁵Nkagumira kimu omumihanda yawe.

⁶Niwe nkunga, ai Ruhanga habwokuba ongarukamu, ntegera okutu, ohurre ebigambo byange.

⁷Yoleka engonzi zawe ezitayuga, Iwe omujuni w'abanyakukwebinga, abanyakuli ha mukono gwawe ogw'obulyo, obaiheho abanyakubahiiganiza.

⁸Ondinde nk'emboni ey'eriiso onsereke omu kituuru ky'amapapa gaawe.

⁹Onyiheho ababi abanyakuunyaga, ebintu byange, abanyanzigwa bange abanyakungosire, abarukugonza kunnyita.

¹⁰Emitima yabo ekingirwe tenyina kuganyira; akanwa kaabo kabagambisa eby'emyehembo.

¹¹Baikara nibandonza; hati bangosire; bafundwire amaiso baanage hansi.

¹²Nibasisana nk'entale erukudunduka kutaagura! Nibasisana nk'entale ensigazi enyakubundaire eyeserekere.

¹³Imuka Ai MUKAMA, baseesire obajuumike! Kwata empirima yawe, ojune obwomeezi bwange,

¹⁴Onkize abantu Ai MUKAMA n'omukono gwawe, onjune abantu abanyina omugabo omu bwomeezi obw'ensi. Enda yabo neekaijule eki wabaahuliire; abaana baabo nibakatunge bakatungurra; nibakasaagise eky'okulekera abaana baabo

¹⁵Baitu nyowe, habw'okuhiikiirra ndirora amaiso gawe; Obu ndisisiimuka, ensisana yawe erinnihisa byona.