Read Runyoro - rutooro Zab 18 Bible Online

Zab 18 - Runyoro - rutooro bible

Zab 18

²MUKAMA nuwe mwandara gwange, kigo kyange, kandi Mujuni wange, Ruhanga wange, omwandara gwange nyebinga, ngabu yange, ihembe ery'okujunwa kwange, bugumizo bwange.

³Nkunga MUKAMA anyakusemeriire kukugizibwa, nubwo njunwa abanyanzigwa bange.

⁴Emiguha y'orufu ekangota ebiisurumba eby'okuhwerekerra byanseesira;

⁵emiguha ya Nyabuyonga ekantuuka, emitego y'orufu yaba Omumaiso gange.

⁶Obu nkaba ndi omumuhito nkakunga MUKAMA; nkalirirra Ruhanga wange ankonyere. Akeema omunju ye yahurra iraka lyange, kandi omukungo namuteeriire gukamuhikaho.

⁷Ensi nukwo kukankana, kugugumuka n'okwehuuba; emisingi y'ensozi, nayo yatukumira kandi yatengeeta, habwokuba akaba abiihiirwe.

⁸Enyindo ye ekacuukwamu omwika, omurro kahwerekereza gwamuruga omukanwa; kandi yarugwamu amanda agengere agarukwaka.

⁹Akainika iguru, lyainama; ekikwasire poo, kyaba hansi y'ebigere bye.

¹⁰Akatemba ekihanga ky'amapapa yahurruka; akeereera yatemba ha mapapa g'omuyaga.

¹¹Omwirima akagufoora kyesweko ekimwehinguliriza, ebicu ebikwasire ebirumu amaizi, yabifoora kyesweko kye.

¹²Omu kyererezi ekikaba kimuli Omumaiso, hakarugamu ebicu bye, orubaale n'amanda ag'omurro.

¹³MUKAMA na uwe akabbwakuliza omwiguru, Anyakuli haiguru muno yaturukya iraka lye nurwo orubaale n'amanda ag'omurro.

¹⁴Akarasa emisogi ye yararangya abanyanzigwa be; yabairukya n'okumulikya kw'omurabyo yabararangya.

¹⁵Emikura y'enyanja nubwo yarozirwe, kandi emisingi y'ensi yoona yasuukurwa, habw'okuhana kwawe, Ai MUKAMA, habw'okuteera okw'orwoya orw'enyindo yawe.

¹⁶Akeema haiguru yampikaho yankwata, yaanyiha omumaizi agahamire.

¹⁷Akanjuna omunyanzigwa wange ow'amaani, n'abo abaanobere; habwokuba, bakaba bampinguraine amaani.

¹⁸Obu nkaba ndi omu muhito, nubwo banseesiire; baitu MUKAMA akaba mubangizi wange.

¹⁹Akanturukya yantwara omukiikaro ekigalihire; akanjuna, habwokuba akansiima.

²⁰MUKAMA akampa empeera naarorra ha buhikiriire bwange; akansasura naalengera ha birungi ebi nakozire.

²¹Habwokuba nkahikiriza MUKAMA ebi asiima, kandi ntarugeho Ruhanga wange, ninkora ebibi.

²²Habwokuba ebiragiro bye byona byaikaraga Omumaiso gange, kandi ebigambo bye ntabinage.

²³Ntabe na kamogo Omumaiso ge, kandi nkeerinda tinacwa musango.

²⁴MUKAMA nukwo kunsasura naarorra ha buhikiriire bwange, naasigikira ha birungi ebi akozire Omumaiso ge.

²⁵Hali omwesigwa, oyeyoleka nkooku oli mwesigwa; ha muntu ataina kamogo, oyeyoleka nkooku otaina kamogo.

²⁶Ha bantu abarungi abataina katonyezi, oyeyoleka nkooku otaina katonyezi; kandi ha baramaire, oyeyoleka nkooku oli w'ekiniga.

²⁷Habwokuba iwe ojuna abantu abaculeezi; baitu amaiso ag'emyehembo ogabundaaza.

²⁸MUKAMA iwe wenka niiwe taara yange; MUKAMA Ruhanga wange Omulikya omu mwirima gwange.

²⁹Habwawe nsobora kusasangura ihe ly'abantu; Ruhanga wange ansobozesa kuguruka ekisiika.

³⁰Ruhanga onu emihanda ye ehikiriire; endagaano ya MUKAMA y'amananu; nuwe ngabu hali abo boona abairukira hali uwe.

³¹Baitu n'oha Ruhanga ondi okwihaho MUKAMA? N'oha omwandara okwihaho Ruhanga waitu wenka.

³²Ruhanga ayanteegere amaani, emihanda yange akagifoora y'obusinge.

³³Ebigere byange abifoora nk'eby'enjaza, ampuumuliza ha biikaro ebiraihire.

³⁴Nuwe atendeka engaro zange kurwana, emikono yange nukwo esobole kugema obuta obw'omulinga.

³⁵Niiwe wampaire engabu y'okujuna kwawe omukono gwawe ogw'obulyo nugwo gwansagikire kandi obukonyezi bwawe nubwo bwanfoire rurangaanwa.

³⁶Okampa ekiikaro ekigalihire eky'okurabamu kandi ebigere byange bitaterebuke.

³⁷Nkairukya abanyanzigwa bange nabakwata; kandi ntagaruke nyuma kuhikya obu baahwerekeriire.

³⁸Nkabacumitira kimu, tibaasobora kwimuka; bakagwa ha nsi y'ebigere byange.

³⁹Habwokuba niiwe wampaire amaani ag'okurwana obulemu niiwe wabadikiize hansi yange.

⁴⁰Niiwe wabingire abazigu bange, kandi abo abaanobere boona nkababuleeza.

⁴¹Bakaliriirra obukonyezi, baitu hatazooke noomu ow'okubajuna, bakaamirra MUKAMA, baitu atabagarukemu.

⁴²Nkabateera nabaniinuura basisana nk'ecuucu enyakucuucuurwa omuyaga; nkabanaga aheeru nk'esaabu y'omumakuute.

⁴³Okanjuna enkungani n'abantu; okanfoora mwebembezi w'amahanga; abantu abankaba ntamanyire nubo baamperiize.

⁴⁴Obu bakaba nibampurraho bati, ahonaaho bakanyorobera; abanyamahanga bakaija nibambundabundira.

⁴⁵Abanyamahanga bakahwerra emitima, baija nibatukumira kuruga omubiikaro byabo nambere bakaba beebohiire.

⁴⁶MUKAMA ahangirize; omwandara gwange asiimwe, anyumizibwe Ruhanga ow'okujunwa kwange,

⁴⁷Ruhanga ayampaire kuhoora enzigu yabundaaza amahanga goona yagata hansi yange.

⁴⁸Ayanjunire abazigu bange; ego, niiwe wanyumiize wanta haiguru yabanyanzigwa bange niiwe wanjunire abantu abahoogozi,

⁴⁹Ai MUKAMA, habwa binu byona, ndakunyumizaaga omu mahanga, kandi ndaazinaga nimpaisaniza ibara lyawe.

⁵⁰Ruhanga aha omukama obusinguzi obutagambwa ayoleka embabazi ezitayuga hali ogu ou yaseesireho amagita nuwe Daudi n'abaijukuru be ebiro byona.