Read Runyoro - rutooro Zab 19 Bible Online

Zab 19 - Runyoro - rutooro bible

Zab 19

¹Iguru litebya ekitiinisa kya Ruhanga, omwanya gurangirra emirimo ye.

²Obwire bwa nyamusana obumu bugambira obwire bwa nyamusana obundi ebigambo; ekiro ekimu, kyegesa ekiro ekindi amagezi.

³Tiharoho rubazo, kandi busaho bigambo; iraka ly'ebi tirirukuhulirwa;

⁴baitu nabwo, iraka lyabyo nirigenda nirirabamu ensi yoona, kandi obukwenda bwabyo, nibuhika hampero y'ensi. Omuli ebi, Ruhanga nuho yateeriire izooba eheema.

⁵Erinyakuturuka nk'omugole omusaija arukuruga omu kisiika likwata omuhanda gwalyo likyanganukire nk'omusaija ow'amaani arukugenda ha mpaka ez'okwiruka.

⁶Liimuka hampero y'iguru, liryehinguliriza lihika hampero yalyo; tiharoho kintu nakimu ekinyakwesereka ekibabu kyalyo.

⁷Ekiragiro kya MUKAMA kihikiriire, kigarramu omwoyo obwomeezi; ebigambo bye by'amananu, biha entabaho amagezi;

⁸Enyegesa z'obulyo zikyanganura omutima; Ekiragiro kya MUKAMA kimulikira amaiso.

⁹Okutiina MUKAMA, kurungi kuliikaraho ebiro n'ebiro; ebigambo bya MUKAMA by'amananu, kandi bihikiriire mali.

¹⁰By'okwegombwa muno kukira ezaabbu, okukirra kimu noobu haakubaire ezaabbu enyingi enungi muno; kandi binura kukira obwoki n'enyondo ey'ebisasara.

¹¹Kandi ebi nibyo bihabura nyowe omwiru wawe; omu kubikwata, nuho hali empeera etagambwa.

¹²Baitu n'oha asobora kwetegereza ensobi ze? Iwe onyiheho emisango enyakuserekerwe.

¹³Kandi otange nyowe omwiru wawe, ndeke kukora ebibi otalibiikiriza kundema, nubwo ntaligira kamogo, ndeke kucwa omusango ogw'ekibi ekikooto.

¹⁴Ebigambo eby'akanwa kange n'okwegambiirra okw'omutima gwange, obisiime, Ai MUKAMA, omwandara, kandi Omucunguzi wange.