Read Runyoro - rutooro Zab 2 Bible Online

Zab 2 - Runyoro - rutooro bible

Zab 2

¹Habwaki amahanga gaimukiirra, n'abantu kuhanuura ebitaina mugaso

²Abakama ab'ensi beteekaniize, kandi abalemi nibacika hamu, kurwanisa MUKAMA n'okurwanisa ogu ou yakomere yaseeswaho amagita, nibagamba bati,

³“Ka tucwacwane empinga zaabo, emiguha yabo tugyejuule tuginage.”

⁴Ogu anyakwikalire omwiguru naaseka; naagaya entegeka zaabo ezitaina mugaso.

⁵Hanyuma nubwo alibaza nabo aine ekiniga abatiinise aine obukaya bwingi, naagamba ati,

⁶“Ha Siyoni orusozi rwange orurukwera, nuho ntaire Omukama wange.”

⁷Akangambira ati, ninyija kubaza ha kiragiro kya MUKAMA ekirukugamba kiti, “Niiwe mwana wange w'obwojo, kiro kya hati nubwo nakuzaara.

⁸Nsaba ndaakuha amahanga bube bugwetwa bwawe, ndaakuha n'emitaano y'ensi ebe itungo lyawe.

⁹Amahanga ago ogacwacwane n'omwigo gw'ekyoma, kandi ogabberengule gafooke bucwagalika nk'ekinaga ky'omubumbi.”

¹⁰Hati nu bakama inywe, mube banyamagezi, inywe abalemi b'ensi muhaburwe.

¹¹Muheereze MUKAMA nimutiina, nimutukumira,

¹²mumuramye nimutukumira, ataikara kubiihirwa, mukagwa omumuhanda; habwokuba ekiniga kye kyaka bwango. Bahiirwa abo boona abanyakumwebinga.