Read Runyoro - rutooro Zab 22 Bible Online

Zab 22 - Runyoro - rutooro bible

Zab 22

¹Ruhanga wange Ruhanga wange, onnagiire ki? Habwaki onyema hara oti otarukunkoyera, otarukuhurra bigambo eby'okusinda kwange?

²Ai Ruhanga wange, nindira nyamusana; baitu tonyanukura; ntaho n'ekiro, baitu tingira kahuumuro.

³Baitu nabwo niiwe Omuhikiriire, anyakwikaliire ha kitebe ky'obukama, Isirairi ou akugiza muno obutamara.

⁴Niiwe baisenkuruitwe baayesigire; bakakwesiga, kandi wabajuna,

⁵Niiwe baateeriire omukungo, baajunwa; bakakwesiga, kandi bataswazibwe.

⁶Baitu nyowe ndi muniongorozi tindi muntu; ninyowe nyamugaywa bantu, kanugwa mahanga.

⁷Boona abanyakundora banterra akakwaza, bansiimuza, bancweraho emitwe;

⁸Bagamba bati “Akeesiga MUKAMA; MUKAMA amujune, amukonyere, habwokuba amugonza!”

⁹Baitu nabwo niiwe wanyihire omunda; niiwe wanyikaize n'obusinge, ninyonka amabeere ga mau.

¹⁰Niiwe nanagiirwe ninkyazarwa nti, kandi okuruga mau obu yanzaire, okaba Ruhanga wange.

¹¹Otanyema hara, habwokuba akabi kali haihi, kandi busaho muntu n'omu ow'okunkonyera.

¹²Enimi nyingi zinyehinguliriize, enimi ez'amaani eza Bbasani zingosire;

¹³Zinyesamiize akanwa zimpangire amaiso, nk'entale enyakutuubire kandi erukububura.

¹⁴Ntaisukire amaani gampoire, ninsisana amaizi agaseesirwe kandi amagufa gange goona gahugukire; omutima gwange nigusisana enkwasi niguunyagira omu kifuba kyange;

¹⁵Amaraka ganyomere nkoruguhyo kandi orulimi rundamatiire omu bihangara by'akanwa kange; ontaire omu cuucu ey'orufu.

¹⁶Mananukwo, embwa zinyehinguliriize; ekitebe ky'enkozi z'ebibi kinyetooroire; bancumisire ebiganja n'ebigere

¹⁷amagufa gange goona, ninsobora kugabara, Abanyanzigwa bange bansunga amaiso nibangunurra.

¹⁸Ebyokujwara byange babibagaine, engoye zange baziteeriire itomo.

¹⁹Baitu iwe Ai MUKAMA, otaba hara! Ai Iwe obukonyezi bwange, orahuke onjuumule!

²⁰Njuna empirima, obwomeezi bwange obwihe omu maani g'embwa!

²¹Onjune onyihe omu kanwa k'entale, omwoyo gwange ogw'obujune, ogwihe omu mahembe g'embogo!

²²Nubwo ndisubirirra bagenzi bange ha ibara lyawe; nkukugize hagati y'ekitebe.

²³Inywe abanyakutiina MUKAMA, mumuhaisanize! Abaana ba Yakobbo inywena, mumunyumize, kandi mumuhe ekitiinisa, inywena abaana ba Isirairi!

²⁴Habwokuba tagaya kandi tanuga muhito gw'arukubonabonesibwa; kandi takamuserekaga maiso ge, baitu obu yamuteeriire omukungo, akamuhurra.

²⁵Niiwe oleetereza ekitebe ky'abantu kwenyumiza; ndihikiriza ebiragaano byange omumaiso g'abo boona abanyakutiina.

²⁶Abarukugadisibwa; balirya baigute; abo abanyakuserra MUKAMA balimukugiza. Emitima yanyu neekahangaale ebiro n'ebiro!

²⁷Empero zoona ez'ensi ziriijuka zihindukire MUKAMA; kandi enganda zoona ez'ensi, ziriramiza Omumaiso ge.

²⁸Habwokuba obulemi buba bwa MUKAMA, kandi nuwe alema amahanga.

²⁹Ego, abanyamyehembo boona ab'ensi, balimwinamira boona abanyakusirimuka omu cuucu baliinama omumaiso ge, nuwe ogu atasobora kukiza obwomezi bwe

³⁰Abaijukuru nubo balimuheereza; abantu balisubirirra abantu eb'ebiro ebirukwija hali MUKAMA,

³¹Kandi balirangirra okujuna kwe abantu abatakazairwe, ngu eki nuwe yakikozire.