Read Runyoro - rutooro Zab 26 Bible Online

Zab 26 - Runyoro - rutooro bible

Zab 26

¹Ai MUKAMA leka nsinge omusango, habwokuba nkagumira omu kukora ebihikire, kandi nyesiga MUKAMA ntaina kutengatengeeta.

²Ai MUKAMA ongumye kandi ondenge; olenge omutima gwange n'amagezi gange

³Habwokuba engonzi zaawe ezitayuga ziinyikaraho, kandi nyikara ndi mwesigwa hali iwe.

⁴Tinteera bisimba n'abantu embiihi z'ebisuba rundi kwetaba n'engobya.

⁵Nnoba okwikara n'enkozi z'ebibi, kandi nyetantara abakora obubi.

⁶Ai MUKAMA, naaba engaro zange ninyoleka nkooku ntaina musango kandi ngenda ninyehinguliriza itambiro lyawe,

⁷ninzina n'amaani ekizina ky'okusiima, kandi ninsubirra ebikorwa byawe byona eby'okuhuniriza.

⁸Ai MUKAMA, ngonza ekiikaro eky'omunju yawe, n'omwanya nambere haikara ekitiinisa kyawe.

⁹Otampwerekereza n'abasiisi, rundi obwomeezi bwange n'abantu abatuubira kuseesa esagama,

¹⁰abantu abaikara nibakora ebintu ebibi kandi ab'emikono yabo ey'obulyo ekwata enguzi.

¹¹Baitu nyowe, ngendera omuburungi bwange; oncungule, kandi ongirre embabazi.

¹²Ekigere kyange kyemeriire ha itaka eriterekeriire omukitebe ky'abantu ekikooto nuho ndaakugirizaaga MUKAMA.