Read Runyoro - rutooro Zab 27 Bible Online

Zab 27 - Runyoro - rutooro bible

Zab 27

¹MUKAMA nuwe Kyererezi kyange n'okujunwa kwange; n'oha ou nditiina? MUKAMA nuwe bugumizo bw'obwomeezi bwange; n'oha owalinkanga?

²Enkozi z'ebibi obubansesira nibagamba eby'okunsiisa, abanyanzigwa kandi abanobi bange beesiitara batabaijuka bagwa.

³Ihe noobu liriteera ensiisira lindamagire, omutima gwange tigulitiina; noobu ndicwekerwa obulemu, nabwo ndaikaraga ninyesiga.

⁴Kintu kimu eki nasabire MUKAMA, eki nikyo ndaserraga; nukwo kwikara omunju ya MUKAMA ebiro byona eby'obwomeezi bwange, ndole oburungi bwa MUKAMA, mpabulirwe omunju ye.

⁵Ha kiro ky'omuhito, alinswekerra omukiituuru kye alimpugura answekererre hansi y'Eheema ye, alinta ha mwandara eruguru.

⁶Omukasumi ako, nubwo ndyebugira abanyanzigwa abanyehinguliriize, mpongere omunju ye ebyonzira, niinyamuza habw'omuhimbo nzinire MUKAMA ebizina ebirungi.

⁷Ai MUKAMA hurra okukunga kwange, ongirre embabazi kandi ongarukemu!

⁸Niiwe wagambire, “Oserre amaiso gange” Omutima gwange nigugamba, “MUKAMA, amaiso gaawe nugo nserra.”

⁹Otansereka amaiso gaawe Omwiru waawe otamubinga habw'ekiniga, niiwe oikara oli mukonyezi wange. Otaanaga, otampemukira, Ai Ruhanga ow'okujunwa kwange.

¹⁰Habwokuba Isenyowe na nyina nyowe bakaanaga baitu MUKAMA talindugaho.

¹¹Ai MUKAMA onyegese omuhanda gwawe; kandi onyebembere omumuhanda oguterekeriire habw'abanyanzigwa bange.

¹²Otandekera abanyanzigwa bange kunkora eki barukwenda; habwokuba bakaiso b'ebisuba banyimukiriire, nibambazaaho ebiitima.

¹³Ninyikiriza ngu ndirora oburungi bwa MUKAMA omunsi y'aboomeezi!

¹⁴Tegereza MUKAMA; ba w'amaani, Omutima gwawe gutunge obumanzi; ego, tegereza MUKAMA!