Read Runyoro - rutooro Zab 31 Bible Online

Zab 31 - Runyoro - rutooro bible

Zab 31

¹Ai MUKAMA niiwe nyebinga; ebiro byona, otalinyikiriza kuswazibwa! Onjune habw'obuhikiriire bwawe.

²Ontegere okutu, onjune bwango! Obe mwandara gw'obwirukiro bwange, obe kigo eky'amaani eky'okujuna!

³Ego, niiwe mwandara gwange kandi kigo kyange; onyebemberege kandi onterekerezeege, nkooku waraganiize,

⁴Ontegurre omumuguha ogu bantegere, habwokuba, niiwe bwirukiro bwange.

⁵Ninyehongera iwe; niiwe wancungwire, Ai MUKAMA Ruhanga omwesigwa.

⁶Onoba abo abatamu ekitiinisa ebitaroho; baitu nyowe, nyesiga iwe MUKAMA.

⁷Ndakyanganukaga kandi niinirwe habw'engonzi zawe ezitayuga, habwokuba, niiwe waboine omuhito gwange, niiwe wataireho omutima enaku zange.

⁸Kandi otankwasa abanyanzigwa bange; niiwe wataire ekigere kyange omukiikaro ekigalihire.

⁹Ongirre embabazi Ai MUKAMA, habwokuba ndi omubujune; amaiso gampohere habw'omuhito, omwoyo gwange n'omubiri gwange, nabyo nukwo biti.

¹⁰Habwokuba obwomeezi bumazirweho obujune, kandi emyaka yange emazirweho kuteera ebiikoohi; amaani gampoire habw'obusaalizi, n'amagufa gange gampweriire.

¹¹Ninyowe nyamugaywa hali abanyanzigwa bange boona, kintu nyakutiinwa abataahi bange, kintu ekirukukanga abamanyi bange; boona abarukunterra amaiso omumakuute, nibanyiruka.

¹²Abantu bakanyebwa nk'ayafiire; ninsisana nk'ekinaga ekyaatikire.

¹³Ego, nimpurra baingi nibahwehweterra epumpu ecwekere ha buli rubaju! Nkooku barukutegeka hamu kundwanisa,

¹⁴Baitu niiwe nyesiga Ai MUKAMA; ningamba nti “Niwe Ruhanga wange.”

¹⁵Ebiro byange biri omungaro zawe, onjune onyihe omu mukono gw'abanyanzigwa bange n'abahiiganiza bange!

¹⁶Amaiso gawe ogamuliikanize nyowe omwiru wawe; onjune habw'engonzi zawe ezitayuga!

¹⁷Ai MUKAMA, otandeka nkaswazibwa, habwokuba niiwe nyebinga; oikirize ababi baswazibwe.

¹⁸Eminwa kabiiha bisuba ogifundikire enyakubaza n'ihoole ha bahikiriire; habw'emyekuliirizo n'emigayo.

¹⁹Ebintu byawe ebirungi, ka bihinguraine ebi wayahuliire abo abanyakukutiina! Kandi ebi wakoliire abanyakukwebinga, omumaiso g'abaana b'abantu!

²⁰Okabasereka omukisweko ky'amaiso gawe, wabaiha omukwekoberwa abantu; okabaikaza n'obusinge omubwigamo bwawe, wabaiha omu mpaka ez'endimi.

²¹MUKAMA akugizibwe habwokuba obunkaba ngosirwe nk'anyakuli omurubuga orugosirwe, akanyoleka engonzi ze ezitayuga.

²²Obu nkaba ninteera enduuru nkagamba nti “Mbingiirwe hara naihwa omumaiso gawe.” Baitu obu nakuliririire onkonyere, okahurra okwesengereza kwange.

²³Mugonze MUKAMA, inywe inywena abahikiriire be, MUKAMA aliinda abeesigwa, baitu omuntu anyakukora n'emyehembo, amusasurra kimu nkooku asemeriire kusasurwa.

²⁴Mugume, mube n'omutima ogw'obumanzi, inywe inywena abanyakunihira omu MUKAMA.