Read Runyoro - rutooro Zab 33 Bible Online

Zab 33 - Runyoro - rutooro bible

Zab 33

¹Mukyanganukire omu MUKAMA, inywe abahikiriire! Kuhaisa kusemerra ab'omutima oguterekeriire.

²Mukugize MUKAMA nimuteera endongo, mumuzinire ekizina ekirungi nimuteera enanga ey'emigoye ikumi!

³Mumuzinire ekizina ekihyaka, Muteere enanga n'amagezi kandi muteere muno emizira.

⁴Habwokuba ekigambo kya MUKAMA kiba ky'amananu; kandi kyona eki akora, akikora omubwesige.

⁵Agonza obuhikiriire n'obwinganiza; ensi yoona ijwire engonzi za MUKAMA ezitayuga.

⁶Ekigambo kya MUKAMA, nikyo kyahangisize iguru, kandi orwoya orw'akanwa ke, akahanga byona ebya haiguru

⁷Akasorooza Amaizi g'enyanja, nk'arukugata omucupa; akata enziha omumaahurro.

⁸Ensi yoona etiinege MUKAMA, abantu boona ab'omunsi, bamutemu ekitiinisa.

⁹Habwokuba akagamba kwonka, eki yagambire kyabaho; akaragira, eki yaragiire kyayemerra.

¹⁰MUKAMA amaraho amagezi g'amahanga; aburanganiza entegeka z'abantu.

¹¹Amagezi ga MUKAMA gaikaraho ebiro n'ebiro, Ebiteekerezo by'omutima gwe, biikaraho ebiro byona.

¹²Ly'omugisa ihanga erinyakulemwa MUKAMA Ruhanga, abantu abo aba yakomere kuba bugwetwa bwe!

¹³MUKAMA ayema omwiguru arora hansi ayetegereza abantu boona;

¹⁴Oku nuho ayema, aikaliire hakitebe ky'obukama, arora abantu ab'ensi yoona,

¹⁵Ogu anyakubumba emitima yabo boona, kandi anyakwetegereza ebikorwa byabo byona.

¹⁶Omukama tajunwa ihe rye erikooto; omuserikale takizibwa maani ge amaingi

¹⁷Embaraasi ey'obulemu teri niyo ereeta kunihira obusinguzi, kandi tesobora kujuna habw'amaani gaayo amaingi.

¹⁸Lero nu, muhwituke, MUKAMA aikaza eriiso lye, hali abanyakumutiina, hali abo abanyakwesiga engonzi ze ezitayuga,

¹⁹nukwo abajune orufu, kandi aboomeeze omukasumi k'ekiihe.

²⁰Obwomeezi bwaitu butegereza MUKAMA, nuwe mukonyezi waitu kandi ngabu yaitu.

²¹Nuwe asemereza emitima yaitu, habwokuba twesiga ibara lye erirukwera.

²²Ai MUKAMA, nkooku tunihirra omuli iwe, engonzi zawe ezitayuga zitwikaleho.