Read Runyoro - rutooro Zab 34 Bible Online

Zab 34 - Runyoro - rutooro bible

Zab 34

¹Ndasiimaga MUKAMA obusumi bwona; akanwa kange karaikaraga nikakugiza MUKAMA.

²Obwomeezi bwange bwenyumiriza omu MUKAMA; Ogu ow'ali omu muhito ahurre kandi aniiniirwe.

³Mukugize MUKAMA hamu na nyowe; itwena tunyumirize hamu ibara lye!

⁴Nkasaba MUKAMA, yangarukamu yanjuna yaamaramu byona ebyantinisaaga.

⁵Mumuhindukire, mukyanganuke; amaiso ganyu tigalikwatwa nsoni.

⁶Omunaku onu, akakunga, kandi MUKAMA yamuhurra, kandi yamujuna yamwiha omumihito ye yoona.

⁷Malaika wa MUKAMA ateera enkande kwehinguliriza abo abatiina MUKAMA, kandi abajuna akabi.

⁸Murozeeho, murole MUKAMA nkooku ali murungi! Ahiriirwa ogu anyakwirukira hali uwe!

⁹Mutiine MUKAMA, inywe abahikiriire be habwokuba abo abamutamu ekitiinisa busaho ekibaburaho kyona!

¹⁰Entale ensigazi zeegomba ebintu kandi zirumwa enjara, baitu abo abaserra MUKAMA tibaburwa karungi na kamu.

¹¹Mwije boojo, mumpulirize, mbeegese okutamu MUKAMA ekitiinisa.

¹²Muntu ki anyakwitanira obwomeezi obw'okusemererwa muno kandi anyakwegomba okuhangaara, nukwo ayegondeze omu birungi?

¹³Ogu asemeriire kutanga orulimi rwe kubaza kubi, n'eminwa yaawe kubaza eby'obugobya.

¹⁴Ayecweho obubi, kandi akole ebirungi; Aserrege obusinge n'omutima gwe gwona.

¹⁵Amaiso ga MUKAMA aikara agataireho abahikiriire, kandi amatu ge aikara agategiire okurra kwabo.

¹⁶MUKAMA aikara naakimba enkozi z'ebibi, nukwo abaragaze omunsi bataligaruka kwijukwa.

¹⁷Abarungi obu baterra MUKAMA omuranga kubakonyera, abahurra, kandi abajuna abaiha omumihito yabo yoona.

¹⁸MUKAMA aikara haihi n'ab'omutima ogutuntwire, kandi ajuna abo abahoirwemu amasiko.

¹⁹Emihito y'abahikiriire nyingi; baitu MUKAMA agibajuna kandi agibarabyamu yoona.

²⁰Aliinda amagufa gaabo goona; busaho na limu hali go erinyakucweka.

²¹Obubi buliita ababi; kandi abo abanoba abahikiriire balicwerwa omusango.

²²MUKAMA alicungura obwomeezi bw'abairu be; hali abo abamwebinga busaho n'omu alicwerwa omusango.