Read Runyoro - rutooro Zab 37 Bible Online

Zab 37 - Runyoro - rutooro bible

Zab 37

¹Oleke kwetuntuza habw'ababi; otakwatirwa ihali enkozi z'ebibi!

²Habwokuba nibaija kucucuka bwango nk'obunyansi; kandi bahotoke nk'ejubwa.

³Oyesigege MUKAMA kandi okolege ebirungi, nubwo oikale omunsi, otunge obusinge.

⁴MUKAMA wenka, nuwe ofoolege muhimbo gwawe, nubwo alikuha omutima gwawe ebi gwegomba.

⁵Omuhanda gwawe ogukwase MUKAMA, omwesige, uwe alikora.

⁶Oburungi bwawe alibuleetera kwera nk'ekyererezi, obuhikiriire bwawe bumuliikane nk'ihangwe.

⁷Oyeculeeze Omumaiso ga MUKAMA, kandi omutegereze n'okugumiisiriza; oleke kwetuntuza habw'ogu anyakwina omugisa omubintu ebi akora, hali ogu anyakuhikiriza ebintu ebibi ebi yategekere.

⁸Wetange kubiihirwa, leka ekiniga! Leka kwetuntuza; eki kireeta akabi, nikyo kyonka.

⁹Habwokuba ababi balihwerekerezibwa; baitu abo abanyakunihira omu MUKAMA, nubo balirya ensi, ebe yabo habwabo.

¹⁰Baitu obu halihinguraho akasumi kake, omubi alihweraho kimu; noobu olyekebiija ota ekiikaro kye, tolimusangayo.

¹¹Baitu abaculeezi nubo balirya ensi, beegondeze omu businge obutalengwa.

¹²Omubi acika kukora kubi omurungi amunenera obugigo;

¹³baitu MUKAMA asekereza omubi ogu, habwokuba arora ekiro kye kiri haihi kuhika.

¹⁴Ababi basomora empirima bagema obuta bwabo kubonesa, kugarra hansi abanaku n'abaseege, kwita abo abakora ebirungi;

¹⁵empirima zaabo ziribacumita omutima, kandi obuta buliicwacwanwa.

¹⁶Akantu akake omuhikiriire aka anyinaho, kakira ebingi ebitabarwa eby'abantu ababi.

¹⁷Habwokuba, emikono y'ababi erihendwa, baitu MUKAMA alihagika abahikiriire.

¹⁸MUKAMA amanyire ebiro by'abataina kabi, kandi obugwetwa bwabo, buliikaraho ebiro n'ebiro.

¹⁹Omu busumi obw'akabi, tibaliswazibwa, omubiro eby'ekiihe, balitunga ebyokulya ebihinguraine.

²⁰Baitu ababi balihwerekerra; baitu abanyanzigwa ba MUKAMA, noobu baliheebwa ekitiinisa bakanyumizibwa, balicuuka nk'omwika bahweho.

²¹Omubi ayohoza, kandi tasasura, baitu omuhikiriire aba mwenda kandi agaba;

²²habwokuba abo MUKAMA aba yahaire omugisa, nubo balirya ensi baitu aba yakyenere balibingwa.

²³MUKAMA nuwe ayebembera omuntu omu muhanda ogu asemeriire kutoma, kandi nuwe amugumya omu muhanda ogu arukugonza;

²⁴noobu agwa, taagwera kimu habwokuba MUKAMA amwimukya.

²⁵Nkaba ndi muto, baitu hati nkuzire; baitu tinkabonaga muhikiriire ahemukiirwe rundi kurora abaana be nibasabiriza ebyokulya.

²⁶Ebiro byona, aikara naagaba n'omutima gumu kandi naahora, oruzaaro rwe nikyo ruliheererwa omugisa.

²⁷Ofuuhyege obubi okole ebirungi; nubwo olihangaara ebiro byona.

²⁸Habwokuba MUKAMA agonza obwinganiza; talihemukira bahikiriire be. Abahikiriire balirindwa ebiro n'ebiro, baitu abaana b'ababi balihwerekerezibwa.

²⁹Abahikiriire balirya ensi, bagiikalemu ebiro byona.

³⁰Akanwa k'omuhikiriire kagamba eby'amagezi, kandi orulimi rwe rubaza eby'obwinganiza.

³¹Ebiragiro bya Ruhanga we bimwikara omu mutima, tatengatengeeta.

³²Omubi aikara ataireho omurungi eriiso, agonza kumwita.

³³Baitu MUKAMA talimulekera munyanzigwa we kandi obu aliba naacwerwa omusango, talimuleka gukamusinga.

³⁴Onihirege omu MUKAMA kandi okolege ebi asiima nubwo alikunyumiza naakuha kulya ensi; olirora ababi nibahwerekerezibwa

³⁵Nkabona omuntu omubi anyina obusobozi obuhinguraine, araihire muno nk'omukogoto ogwa Lebbanoni.

³⁶Baitu obu narabire aho obwakabiri akaba atakyaroho; noobu namuserwiire nta, ntasobole kumuzoora.

³⁷Oyetegereze omuntu atanyina kabi, kandi orolerre ow'omutima oguterekeriire, habwokuba omuntu ow'obusinge, nuwe atunga abaijukuru.

³⁸Baitu abasiisi balihwereekererezibwa kimu; oruzaaro rw'ababi rulicwekerezibwa.

³⁹MUKAMA nuwe ajuna abahikiriire, omu kasumi ak'omuhito, nuwe bwirukiro bwabo.

⁴⁰MUKAMA abakonyera kandi abajuna, abajuna abaihaho ababi. Kandi abacungura, habwokuba bamwebinga.