Read Runyoro - rutooro Zab 40 Bible Online

Zab 40 - Runyoro - rutooro bible

Zab 40

¹Nkategereza MUKAMA n'okugumiisiriza akantegera okutu yahurra okurra kwange.

²Akanyimukya yanyiha omu kiina eky'amasu yanyiha omu kisaaru eky'esaabu, yanyemereza ha mwandara yansoboza kurubata ningumya.

³Akanyegesa ekizina ekihyaka, ekizina eky'okukugiza Ruhanga waitu. Baingi balirora kandi balitiina, kandi beesige MUKAMA.

⁴W'omugisa anyakwesiga MUKAMA ateetaba n'ab'emyehembo, atateerana n'abo abanyakuhaba nibaramya embandwa.

⁵Ai MUKAMA Ruhanga wange, okatukorra ebihuniriza bingi, kandi okatutegekera ebyokuhuniriza bingi, busaho n'omu alengesanizibwa na iwe! Kakuba ndengaho kubirangirra n'okubisubirra, byakuhinguraine birema kubarwa.

⁶Ebyonzira n'ebihongwa tobigonza; baitu okampa okutu okwigukire nkuhurre Ebihongwa eby'okwokya n'eby'okuganyiza ebibi, tobyetaaga.

⁷Nubwo nagambire nti, “Ndi hanu nyizire, omu muzingo ogw'ekitabu, kikampandiikwaho kiti:

⁸Ai Ruhanga wange, nsemererwa kukora ebi ogonza; Ebiragiro byawe biri omumutima gwange.”

⁹Nkasubirra amakuru amarungi ag'okujunwa ndi omukitebe ky'abantu ekikooto;

¹⁰Dora Ai MUKAMA nkooku omanyire, ntalekerre kugarangirra. Obukonyezi bwange obunyakujuna, ntabusereke omu mutima gwange! Nkabazaaho obwesige n'okujuna kwawe; engonzi zawe ezitayuga n'obwesige bwawe, ntabiculerre kubisereka ekitebe ekikooto.

¹¹Ai MUKAMA otanga kunganyira. Engonzi zawe ezitayuga n'obwesige bwawe, obutoosa bindindege!

¹²Habwokuba ebintu ebibi ebitarukubarwa binyehinguliriize; obubi bwange bumpinguraine, bwanyita amaiso, okuhika obundemerwe kurora; bwingi nibukira isoke erya hamutwe gwange; amaani gampoire,

¹³Ai MUKAMA ongirre embabazi onjune! Ai MUKAMA, orahuke onkoonyere!

¹⁴Abarukwenda kusahura obwomeezi bwange, baswazibwe kandi baburanganirizibwe kimu; abo abanyakugonza ngwe omukabi, bagarurwe enyuma kandi bahemurwe.

¹⁵Abarukunswahiriza bati, “Ahaa, Ahaa!”

¹⁶Baitu boona abanyakukuserra, bakyanganuke basemerererwe omuli iwe; abo abanyakugonza okujuna kwawe, bagambe obutaleka bati, “MUKAMA w'ekitiinisa!”

¹⁷Baitu nyowe ndi munaku kandi ndi museege; baitu MUKAMA anteekereza. Niiwe mukonyezi wange kandi mujuni wange; Ai Ruhanga wange, otabandaara.