Read Runyoro - rutooro Zab 44 Bible Online

Zab 44 - Runyoro - rutooro bible

Zab 44

¹Ai Ruhanga, tukahurra n'amatu gaitu, baisenkurwitwe bakatugambira, ebintu ebi wakozire omu biro byabo, omu biro ebyakara.

²Iwe n'omukono gwawe wenka okabingamu amahanga, baitu bo wababyara omunsi yabo; Amahanga maingi okagabonesa emihito, baitu bo okabaha obugabe;

³Ensi batagisinguze empirima yabo bonka, rundi emikono yabo etabaleetere businguzi baitu bukaba busobozi bwawe n'amaani gaawe n'ekyererezi eky'amaiso gawe habwokuba okabagonza.

⁴Niiwe Omukama kandi Ruhanga wange, ayahaire Yakobbo obusinguzi,

⁵Habw'obusobozi bwawe tusingura abanyanzigwa baitu, habw'Ibara lyawe turubatirra hansi abanyakutuseesira,

⁶Tinyesiga obuta bwange, noobwakubaire empirima yange tesobora kunjuna.

⁷Baitu iwe okatujuna banyanzigwa baitu, abo abanyakutunoba okababuranganiza.

⁸Twenyumirizaamu Ruhanga obutaleka, ebiro byona turaasimaga Ibara lyawe.

⁹Baitu nabwo okatunaga watubundaaza, tokyaramaga n'amahe gaitu.

¹⁰Olekere abanyanzigwa baitu baatubinga; ebikaba biri byaitu babitunyagireho.

¹¹Otufoire nk'entaama ez'okwita, Oturarangize omu mahanga.

¹²Abantu baawe obagulize amasa, tosabire muhendo ogubasemeriire kugurwa.

¹³Otufoire kiteburo hali abataahi baitu, twafoka omugayo kandi ab'okusekereza hali abo abatuherraine.

¹⁴Okatufoora orufumo orucwibwa omu mahanga watufoora kisekwa omu bantu.

¹⁵Ekihemu kinyikaraho ekiro kyona, ensoni zinswekerra ha maiso.

¹⁶Habw'ebigambo ebyabarukumpahaaza n'abarukunjuma, Omumaiso g'abanyanzigwa baitu n'abahoozi b'enzigu.

¹⁷N'obu turaaba tutarakweberwe, rundi kucwa endagaano yaawe, binu byona bikatwizira.

¹⁸Tutasiise obwesige hali iwe, tutacwe Ebiragiro byawe,

¹⁹nabwo okatucwacwanira omukiikaro ky'empisi, watubuutikira n'omwirima kasira.

²⁰Obu twakubaire tweberwe ibara lya Ruhanga waitu, rundi tusabire Ruhanga omunyamahanga,

²¹eki Ruhanga tiyakukizoire? Habwokuba amanyire ensita z'omutima.

²²Kwongera hali ebi, habw'Ibara lyawe izooba lyona tusiiba nitwitwa nitusisanizibwa nk'entaama ez'okwitwa.

²³Ai MUKAMA, matuka ogwijagizibweki? Sisiimuka! Otalitunaga ebiro byona!

²⁴Habwaki otwesereka? Habwaki oyebwa emihito n'okubonabonesibwa kwaitu?

²⁵Habwokuba emyoyo yaitu eyegemere hansi omu cuucu; emibiri yaitu ekwatiire ha itaka.

²⁶Imuka, ija otukoonyere! Otujune habw'engonzi zaawe ezitayuga.