Read Runyoro - rutooro Zab 45 Bible Online

Zab 45 - Runyoro - rutooro bible

Zab 45

¹Omutima gwange nigubooga nebitekerezo ebirungi Ebigambo byange nimbibaliza omukama; orulimi rwange, nirusisana ekalamu ey'omuhandiiki anyakwikara ayeteekaniize

²Niiwe okirra kimu boona kusemera; obaza eby'embabazi byonka; Ruhanga nikyo yakuheeriire omugisa ebiro byona.

³Iwe ow'obusobozi weteege empirima yawe erengiije ha kibero kyawe. Oina ekitiinisa n'obukuru bwawe!

⁴Omu kitiinisa kyawe, genda otembere nk'omusinguzi osingirre amananu, kandi orwanirre obwinganiza; omukono gwawe ogw'obulyo, gukwegese ebi osemeriire kutiina!

⁵Emisogi yawe etoire, neerasa emitima ey'abanyanzigwa b'omukama; amahanga nigagwa omumaiso gaawe.

⁶Ekitebe kyawe eky'obukama eki wahairwe Ruhanga, kiriikaraho ebiro n'ebiro. Omwigo gwawe ogw'obukama, mwigo gw'obwinganiza;

⁷Ogonza obuhikiriire kandi onoba obubi. Ruhanga wawe, nikyo yakuseesiireho amagita ag'okusemererwa okukira bataahi bawe;

⁸ebyokujwara byawe byona, nibiboya emigaju, eseeta n'emisole ebintu eby'emigoye ebyakozirwe omu bikaali eby'emisanga, nibyo bikusemereza;

⁹ababiitokati ab'abakama, nubo bali omubakazi bawe ab'ekitiinisa; ha mukono gwawe ogw'obulyo, heemerraho omugo, ajwaire ebintu eby'okwekunisa eby'ezaabbu ey'Ofiri.

¹⁰Wewe Kaabago oteekereze, kandi otege okutu oyebwe abantu bawe n'enju ya sso;

¹¹habw'okusemera kwawe, omukama naija kukugonza muno, nkooku ali MUKAMA wawe omwinamirege n'omutamu ekitiinisa.

¹²Abantu ba Taaya, balikurabuka ebisembo, abarukukirra kimu abantu boona obuguuda,

¹³balikurabuka obuguuda obw'emiringo yoona. Omubiitokati naajwara omukisiika kye ebyokujwara ebikozirwe omu zaabbu,

¹⁴Omwisiki ngugwo naagabuka mw'omukama, ajwaire ebyokujwara eby'erangi ezitali zimu ali hamu n'abaisiki bataahi be empikirre, abataahire obugenyi bwe.

¹⁵Beebembiirwe nibataaha omukaruziika y'omukama, baina omuhimbo n'omuniiniiro.

¹⁶Omu kiikaro kya baaswenkuru, nihaija kugarukamu batabani bawe; olibafoora balemi omunsi yoona.

¹⁷Ibara lyawe ndirireetera kwijukwaga n'okuhaisanizibwaga; habweki, amahanga garaakunyumizaaga ebiro n'ebiro.