Read Runyoro - rutooro Zab 48 Bible Online

Zab 48 - Runyoro - rutooro bible

Zab 48

¹Omu rubuga rwa Ruhanga waitu, hakasozi ke akarukwera, MUKAMA w'ekitiinisa kandi w'okukugizibwa muno!

²Orusozi rwe orurukwera oruraihire kandi orusemiire, nugwo omuhimbo ogw'ensi yoona, orusozi Siyoni orunyakuli hara omu Matemba, nurwo orubuga orw'Omukama ow'ekitiinisa.

³Omu bigo byarwo, Ruhanga ayeyolekere nkooku ali muhingo ogw'amananu.

⁴Habwokuba murole, abakama nkooku baayesoroize, baija hamu.

⁵Bakarumisa kukirora bati, baatangaara, obutiini bwayenda kubaita, bairuka;

⁶baatandika kutukumira, nibahururwa nk'omukazi arukurumwa ebisa eby'okuzaara.

⁷Baitu omuyaga gwa Burugaizooba, nugwo wacwacwanisize emeeri za Tarasiisi.

⁸Ebi tukaba tuhuliire, tukabyerorra itwenka omu rubuga rwa MUKAMA ow'amahe, orubuga orwa Ruhanga waitu, oru yagumize ebiro byona.

⁹Ai Ruhanga, obu tuba tuli omunju yawe, tuteekerezaaho engonzi zawe ezitayuga.

¹⁰Ai Ruhanga, okugizibwa abantu ab'omunsi yoona kandi okuranganwa kwawe kuhika ha nsonda zoona ez'ensi. Obusinguzi bukuli omu mukono gwawe ogw'obulyo;

¹¹orusozi Siyoni rukyanganuke! Habwemicwere yawe ey'emisango, bahara ba Yuda baniiniirwe!

¹²Rabamu orubuga Siyoni, orwehingulirize, obale eminaara yarwo,

¹³oyetegereze kurungi ebisiika byarwo ebiruzitiriirweho, orabemu ebigo byarwo; nubwo olitebeza abantu ab'obusinge obuliija,

¹⁴hanu nkooku haroho Ruhanga, Ruhanga kandi omwebembezi waitu, ebiro byona.