Read Runyoro - rutooro Zab 49 Bible Online

Zab 49 - Runyoro - rutooro bible

Zab 49

¹Muhurre kinu, inywe amahanga! Muhunde amatu inywena abaikazi ab'omunsi yoona,

²ab'ekitiinisa n'abatali b'ekitiinisa, abaguuda n'abanaku inywena hamu!

³Akanwa kange karaabaza eby'amagezi; omutima gwange guhwehweterre ebintu eby'obwetegereza.

⁴Nditega okutu mpurre orufumo; ekikoikyo kyange ndikyatira ha kizina eky'endongo.

⁵Omu busumi obw'akabi. Abarukumpiiganiza nibenda kunkora kubi banyehinguliriize, nditiina ki?

⁶Abantu abanyakwesiga obuguuda bwabo, bakenyumiriza ha itungo lyabo erihinguraine

⁷Mananukwo, tiharoho muntu n'omu asobora kwecungura wenka, rundi kuha Ruhanga omuhendo ogw'okugura obwomeezi bwe,

⁸omuhendo ogw'okucungura obwomeezi bwabo mukooto muno kandi tigurukumara,

⁹nukwo asobole kwomeera ebiro byona atahikire omu kituuro.

¹⁰Ego, alyetegereza noobwakubaire ab'amagezi nkooku bafa, endoma n'entaami b'okuhwerekerra omu mulingo gumu, kandi obuguuda bwabo babusigira abandi.

¹¹Ensi noobu baraaba baazirukire amabara gaabo, ebituuro byabo nugo amaka gaabo ebiro byona, nubwo obwikaro bwabo obw'ebiro byona.

¹²Omuntu taikara ali ruranganwa, asisana nk'enyamaiswa ezinyakuhwerekerra.

¹³Eki nikyo kyateekaniriziibwe abantu abaina obwesige obw'obudoma, niyo empero y'abo abanyakutwarwa itungo lyabo.

¹⁴Bakateekanirizibwa kufa nk'entaama, Rufu nuwe aliba muliisa wabo; baligenda batereekeriire basirimuke omu kituuro, ensisana yabo erihinduka; nyabuyonga niyo eriba eka yabo.

¹⁵Baitu Ruhanga alicungura obwomeezi bwange abwihe omubusobozi bwa Nyabuyonga, habwokuba alinyikiriza.

¹⁶Obu oraabonaga omuntu yatunga rundi ekitiinisa ky'enju kyayeyongera, eki kirekege kukutiinisa.

¹⁷Habwokuba obu alifa, taina kantu na kati akaalitwara; ekitiinisa kye tikirisirimuka nikimuhondera.

¹⁸Obu aba akyayomiire noobu ayeyeta muhiirwa, abantu bakamuhaisaniza habw'ebirungi ebi akozire,

¹⁹Alikurata baisenkuru, abataligaruka kurora kyererezi na kati.

²⁰Omuntu taikara ali ruranganwa, asisana nk'enyamaiswa ezinyakuhwerekerra.