Read Runyoro - rutooro Zab 50 Bible Online

Zab 50 - Runyoro - rutooro bible

Zab 50

¹Ogu Ow'obusobozi, Ruhanga MUKAMA, abaza kandi ayeta ensi okuruga Burugaizooba okuhika Bugwaizooba,

²Ruhanga amulikana ali Siyoni orwasemeriire kimu orutaina ekirugambwaho.

³Ruhanga waitu naija, taculiire Omumaiso ayebembiirwe omurro kacwekereza, orubaju n'orubaju ihunga kahuguta.

⁴Naayeta iguru n'ensi bibe bakaiso, bamurole nacwera abantu be omusango.

⁵“Mwesorooze mwije mbere ndi inywe abeesigwa bange, abaakozire na nyowe endagaano nimutamba ekyonzira!”

⁶Iguru nirirangirra obuhikiriire bwe, habwokuba Ruhanga wonyini nuwe Mucwi w'emisango!

⁷Ai bambi muhurre inywe bantu bange, mbaze, ninyowe Ruhanga, Ruhanga wawe.

⁸Tindukukujunaana habw'ebyonzira byawe; ebihongwa byawe ebyokeze obutoosa tibinduga omumaiso.

⁹Tindiikiriza nimi n'emu ey'eriruga omunju yawe rundi empaya y'embuzi ey'eriruga omumasibiko gawe.

¹⁰Habwokuba buli kisoro kyona eky'omu kibira kyange, oteho n'ente ezinyakuli ha nsozi rukumi.

¹¹Mmanyire ebinyonyi byona eby'omu mwanya n'ebi byona ebinyakwikara omukisaka nabyo byange.

¹²“Obu naakurumirwe enjara tinaakukugambiire, habwokuba ensi yoona na byona ebinyakugirumu, byange.

¹³Nyowe ndya enyama y'enimi, rundi nywa esagama y'embuzi?

¹⁴Ohongerege Ruhanga ekyonzira eky'okusiima, kandi ohikirizeege ebiragaano ebi oragaana n'Ogu anyakuli haiguru muno,

¹⁵Obu oraabaga omukabi, nubwo onyetege; ndikujuna kandi na iwe olinkugiza.”

¹⁶Ruhanga akaguza omusiisi ati, ebiragiro byange osobora ota kubikwata omumutwe kwonka, rundi endagaano yange kugigambisa akanwa kwonka?

¹⁷Habwokuba onoba kuhaburwa kandi ebigambo byange okabyenagira enyuma.

¹⁸Kakuba obona omusuma, ogu nuwe oganjana na uwe; abasiihani nabo oteera nabo ebisimba.

¹⁹Akanwa kaawe okaikiririza kimu kubaza obubi, kandi orulimi rwawe ruyungayunga obucwangya.

²⁰Oikaarra kandi obazaaho ow'oruganda rwawe, ojonjogora omwana wa nyoko wonyini.

²¹Ebintu ebi okabikora nakuculerra; okateekereza oti ndi muntu nka iwe. Baitu hati ninkuhana kandi ninkutaho omusango.

²²“Hati nu mwetegereze kinu inywe abanyakwebwa Ruhanga ntaikara kubataagataagura, hakaburaho n'omu ow'okubajuna!

²³Omuntu anyakuleeta ekyonzira kye eky'okusiima, antamu ekitiinisa, ogu anyakuterekereza kurungi omuhanda gwe, nuwe ndyoleka okujuna kwa Ruhanga!”