Read Runyoro - rutooro Zab 51 Bible Online

Zab 51 - Runyoro - rutooro bible

Zab 51

¹Ai Ruhanga onganyire noororra ha kuganyira ngonzi zawe ezitayuga, ondagazeeho ekibi kyange nosigikira ha kuganyira kwawe okwingi okuhinguraine.

²Onyogeze kimu onyiheho obubi bwange, kandi onsemeze onyiheho ekibi kyange!

³Habwokuba, mmanyire ebyokusiisa byange, kandi obutoosa, nyikara ninteekereza ekibi kyange.

⁴Iwe, iwe wenka niiwe nasiisiire, kandi nakora ekibi omumaiso gawe, nukwo obege mwinganiza omu ndamura yawe, oburwege akamogo omumicwere yawe.

⁵Orole, nkazaalirwa omububi, kandi nyina nyowe enda yange, akagitwarra omukibi

⁶Orole, ogonza omuntu abe w'amananu agamuhamire omunda, habweki onyegese ensita ez'amagezi.

⁷Onsemeze n'omwihura, nsemere, onyogye, nyere kukira pamba.

⁸Onyijuze omuhimbo n'omuniiniiro; amagufa aga wasesengwiire gakyanganuke.

⁹Osereke amaiso gawe oleke kurora ebibi byange, kandi oragalize kimu ebyokusiisa byange byona.

¹⁰Ai Ruhanga ompangemu omutima ogusemiire, kandi ontemu omwoyo omuhyaka ogutereekeriire.

¹¹Otanyiha omumaiso gawe okampungura hara, kandi otanyaka Mwoyo wawe arukwera.

¹²Ongarurre omuhimbo ogw'okujuna kwawe, kandi onkwatirre n'omwoyo ogw'engonzi.

¹³Nubwo ndyegesa ababi emihanda yawe, abasiisi bagaruke hali iwe.

¹⁴Ai Ruhanga onjune onyiheho omusango ogw'okuseesa esagama, iwe Ruhanga, iwe Ruhanga ow'okujunwa kwange, orulimi rwange nubwo rulizina n'iraka erya haiguru, habw'okujuna kwawe.

¹⁵Ai MUKAMA oyesamye eminwa yange, akanwa kange karangirre amahaiso gawe.

¹⁶Kakuba mponga ekihongwa ekyokwokya, tiwakusemeriirwe; habwokuba tosemezibwa bihongwa.

¹⁷Ekyonzira ekinyakusiimwa Ruhanga, nugwo omwoyo ogwegarukiremu; Ai Ruhanga, omutima ogwegarukiremu kandi ogwebundaize toligugaya.

¹⁸Korra Siyoni ebirungi osemeriirwe muno; yombeka buhyaka ebisiika bya Yerusaalemu.

¹⁹Nubwo olisemerererwa ebyonzira ebihikire, ebihongwa eby'okwokya n'ebihongwa ebyokeze bihikiriire; enimi nubwo zirihongwa ha itambiro lyawe.