Read Runyoro - rutooro Zab 55 Bible Online

Zab 55 - Runyoro - rutooro bible

Zab 55

¹Ai Ruhanga, ninkusaba ohuliirize esaara yange; oteesereka okwesengereza kwange!

²Ompulirize, kandi ongarukemu; emihito yange empinguraine,

³Eby'abanyanzigwa bange barukumpayira nibintiinisa habw'okubonabonesa kw'ababi. Habwokuba nibandeetera omuhito, nibanyikazaaho itima baina ekiniga.

⁴Omutima gwange gwine obujune, obutiini bwa rufu bumpikireho.

⁵Obutiini n'ekitukumo bimpikireho.

⁶Nukwo kugamba nti “Haa! Kakuba mbaire nyina amapapa nk'eriiba? Nakuhurrukire ngenda hara mpuumura;

⁷ego, naakuhambaaliire hara, nyegoonya omwirungu,

⁸nakurahukire nyeserurra hokwebinga, ndeke kuhikwaho enjato n'ihunga!”

⁹Ai MUKAMA, ohwerekereze entegeka zaabo, oburanganize endimi zaabo; habwokuba nindora obuhoogozi n'enkungani omurubuga.

¹⁰Nyamusana n'ekiro nibagenda nibehinguliriza ebisiika byarwo itima n'omuhito nuho biri,

¹¹okuhwerekerra kuruli hagati; omwerengerro n'obugobya tibiruga omukatale kaarwo.

¹²Omunyanzigwa tali nuwe arukumpaahaaza rundi naakubaire ninkigumisiriza; tali muhiigani arukunyenyumirizaho rundi, nakumweserekere.

¹³Baitu niiwe, ou ndukwingana na uwe, mutaahi wange, enganjani yange nfe na nfe.

¹⁴Twaikaraga nitubaza hamu obugambo bwaitu nitunyumya; omunju ya Ruhanga nuho twaramizaaga hamu.

¹⁵Orufu rubahikeho, basirimuke nyabuyonga bali boomeezi; bagende omubituuro byabo nibatiina.

¹⁶Baitu nyowe nkunga Ruhanga; kandi MUKAMA nuwe alinjuna.

¹⁷Nyenkya kara, omu ihangwe n'omu rwiririzi, mpyema kandi nsinda araahurraga iraka lyange.

¹⁸Alincungura anyihe omubulemu obu ndukurwana, ampe obusinge; habwokuba baingi abajwaliriize nibandwanisa.

¹⁹Ruhanga alintegera okutu abaculeeze, ogu anyakwikaliire ha kitebe ky'obukama okuruga ira lyona; habwokuba bo tibakwata biragiro, kandi Ruhanga tibamutiina.

²⁰Mutaahi wange akagorra omukono gwe arwanise enganjani ze yacwa endagaano ye.

²¹Orubazo rwe rukaba niruheheera kukira amagita, kandi kunu omumutima gwe naacika obulemu. Ebigambo bye bikaba nibyoroba kukira amagita. Kandi kunu bikaba nibisara nk'empirima z'obwogi.

²²Omugugu gwawe ogunagire MUKAMA, araakukwatirraga ebiro byona taliikiriza omuhikiriire kusingurwa.

²³Baitu iwe, Ai Ruhahga obahungule hansi omukiina ekirukukirra kimu kuhama; abaisi abo kandi encwangya baleke kwomeera ekicweka ky'obwomeezi bwabo, baitu nyowe ndayesigaga iwe.