Read Runyoro - rutooro Zab 59 Bible Online

Zab 59 - Runyoro - rutooro bible

Zab 59

¹Ai Ruhanga wange, onjune kuruga hali abanyanzigwa bange, onjune abo abaanyimukirra.

²Onjune enkozi z'ebibi, kandi onkize kuruga omuli abo abarurukira esagama y'abantu.

³Baitu dora, beserekerra obwomeezi bwange; abasaija ab'amaani beesorooza hamu okunseesira.

⁴Baitu Ai MUKAMA, tinyina kabi rundi ekibi, tinyina nsobi yoona, baitu bairuka kunyeteekaniriza.

⁵Baitu imuka wenka orole, onkoonyere! Iwe Ruhanga ow'amahe, iwe Ruhanga owa Isirairi Sisiimuka obonereze amahanga; abo omubucwangya bwabo abategeka kukora ekibi, otasigaho n'omu.

⁶Buli kairirizi bagaruka, nibaboigora nk'embwa nibagenda nibasoobasooba omurubuga.

⁷Nukwo bati, bajuga n'akanwa kaabo, nibabaza obuntamantama n'eminwa yabo nibateekereza ngu “N'oha araatuhurra?”

⁸Baitu iwe, Ai MUKAMA, noobasekereza; amahanga noogaterra enaku.

⁹Iwe Amaani gange, ndaazinaga eby'okukukugiza; habwokuba iwe, Ai Ruhanga n'iwe kigo kyange.

¹⁰Omungonzi ze ezitayuga Ruhanga wange alintangatangana Ruhanga wange alinsinguza abanyanzigwa bange.

¹¹Otabaita, abantu bange bataija kwebwa; habw'obusobozi bwawe obakankanize, kandi obabundaaze, Ai MUKAMA, engabu yaitu!

¹²Habw'ekibi ky'akanwa kaabo, n'ebigambo by'eminwa yabo, obaleke bakwatirwe omumyehembo yabo.

¹³Habw'okukondereza n'ebisuba ebi babaza obahwerekereze n'ekiniga, obabuulereze kimu kuhikya boona bahoireho, abantu nukwo bamanye Ruhanga nkooku alema Yakobbo omu nsonda zoona ez'ensi.

¹⁴Omu kairirizi bagaruka, nibaboigora nk'embwa nibasoobasooba omurubuga rwona.

¹⁵Bajeerajeera nibaserra ebyokulya baruruma obu bataiguta.

¹⁶Baitu ndaazinaga hamaani gaawe; ndaazinaga muno ha ngonzi zaawe ezitayuga omu rukyakya. Habwokuba iwe niiwe oba rukomera rwange kandi obwirukiro omukiro ky'emihito.

¹⁷Ai iwe maani gange, ndaazinaga ninkukugiza, habwokuba iwe Ai Ruhanga niiwe kigo kyange, Ruhanga anyakunyoleka engonzi ezitayuga.