Read Runyoro - rutooro Zab 63 Bible Online

Zab 63 - Runyoro - rutooro bible

Zab 63

¹Ai Ruhanga, niiwe Ruhanga wange, nkuserra, omwoyo gwange gukukwatirwa iroho; nigusisana nk'itaka eryomere kandi erijwahire nambere hatasangwa maizi.

²Nikyo nkutunuliriire omukiikaro ekirukwera, nindora obusobozi n'ekitiinisa kyawe.

³Habw'engonzi zaawe ezitayuga nkooku ikira obwomeezi eminwa yange eraakukugizaaga.

⁴Habweki ndaakusiimaga bwona nkyali mwomeezi; Ndaimukyaga emikono yange ninsaba.

⁵Omwoyo gwange guraigutaga nk'anyakuliire omusoina n'ebisajwa, kandi akanwa kange karaazinaga ebizina eby'omuhimbo ebyokukukugiza,

⁶Obu nkuteekereza ndi ha kitabu kyange, kandi nkakwecumitirizaaho omu bisisiimuko omu itumbi;

⁷habwokuba niiwe wabaire mukonyezi wange, omukiituuru ky'amapapa gaawe nzina n'omuniniiro.

⁸Omwoyo gwange gwikara gukuli haihi; omukono gwange ogwobulyo gunkwatirra.

⁹Baitu abaserra kuhwerekereza obwomeezi bwange baligenda okuzimu omwitaka,

¹⁰Balihebwayo hali obusobozi bw'empirima baliba byokulya bya hurutu.

¹¹Omukama alininiirwa habwa Ruhanga kumuha obusinguzi; abo boona abaraganiza nibarahira omu ibara lya Ruhanga balitunga ekitiinisa; habwokuba akanwa k'ababiihi b'ebisuba kaliigarwa.