Read Runyoro - rutooro Zab 68 Bible Online

Zab 68 - Runyoro - rutooro bible

Zab 68

¹Leka Ruhanga amatuke, nukwo abanyanzigwa be bararange abo abanyakumunoba bairuke bamuruge omumaiso

²Omwiika nkooku gucuucurwa omuyaga; enkwasi nkooku eyaga eri haihi n'omurro ababi nabo, nukwo bahwerekerre bati omumaiso ga Ruhanga!

³Baitu abahikiriire bakyanganuke; baniiniirwe omumaiso ga Ruhanga; beebuge baina omuhimbo!

⁴Muzinire Ruhanga, muzine eby'okuhaisaniza ibara lye; mumuzinire ekizina ogu anyakutemba ebicu; ibara lye nuwe MUKAMA. Mwebundaze Omumaiso ge!

⁵Mukumanfuuzi kandi omulinzi w'enfaakati, nuwe Ruhanga anyakwikara omukiikaro kye ekirukwera.

⁶Ruhanga aha ow'amasu eka emboijana ey'okwikaramu; ataisura abanyankomo abaha obusinge; baitu abeemi baikara omunsi enyakwomere.

⁷Ai Ruhanga, obu wayebembiire abantu bawe, obu warubasire waraba omwirungu,

⁸ensi ekatengeeta, iguru lyafukumuka enjura, omumaiso ga Ruhanga; Iwe Sinai, okakankana omumaiso ga Ruhanga, Ruhanga owa Isirairi.

⁹Ai Ruhanga, okanaga omugisa, gwenjura wagarra buhyaka obugwetwa bwawe.

¹⁰Abantu bawe baikaraga omu: Niiwe, Ai Ruhanga, watekaniriize abaseege, habw'oburungi bwawe.

¹¹MUKAMA naaragira; ihe ly'abo abarukutwara amakuru.

¹²“Abakama ab'amahe nibairuka, nibairuka!” Abakazi abanyakuli omuka, nibabagana omugabo,

¹³noobu baaraba nibaikara omumasibiko g'entaama hagati nugo amapapa g'eriiba agasiigirwe efeeza, n'ebyoya byalyo ebisiigirwe zaabbu.

¹⁴Ow'obusobozi bwona obu yararangiize oku abakama ebirika bikagwa ha rusozi Zalimoni.

¹⁵Haa, iwe rusozi orw'amaani, orusozi orwa Bbasani!

¹⁶Iwe rusozi orw'obutwetwe nyamwingi, rusozi rwa Bbasani! Kiki ekirukukuroza n'ihali orusozi, Ruhanga oruyayegombere rube bwikaro bwe, MUKAMA nambere araikaraga ebiro byona?

¹⁷MUKAMA akaruga Sinai yataaha ekiikaro ekirukwera aina ihe ery'abatembi b'ebigaali omutwaro gumu emirundi ebiri, emitwaro n'emitwaro.

¹⁸Okatemba orusozi oruraihire, oyebembiirwe abanyagwa abakusendekeriize, kandi nootunga ebisembo omu bantu, MUKAMA Ruhanga nukwo aikale oku.

¹⁹Akugizibwe MUKAMA, ogu anyakutugumiisiriza buli kiro; Ruhanga nuwe kujunwa kwaitu;

²⁰Ruhanga waitu nuwe Ruhanga nyamujuna; Ruhanga MUKAMA ogu, nuwe akiza abantu orufu

²¹Baitu Ruhanga alibberengura emitwe y'abanyanzigwa be; oruhorohozi orunyakuroho isoke orw'ogu anyakulemera omu ngeso ze embi.

²²MUKAMA akagamba ati: “Ndibaiha omu nziha z'amaizi mbagarre,

²³ebigere byawe nukwo obinaabise esagama, embwa zawe nukwo zitungeho abanyanzigwa omugabu gwazo.”

²⁴Ai Ruhanga, emisorongo yawe ey'ekitiinisa, ngigyo neerorwa, emisorongo eya Ruhanga Omukama wange, neetaha omu kiikaro ekirukwera.

²⁵Abazini bali omumaiso, abateezi b'enanga bamaliriire enyuma, hagati y'abo, harumu abaisiki abarukuteera obugoma obw'enjogera:

²⁶Mukugize Ruhanga omu kitebe, ekikooto, muhaisanize MUKAMA, inywe oruzaaro rwa Isirairi!

²⁷Oruganda rwa Benyamiini orurukukirra kimu zoona obuke, nurwo rwebeembiire, haakurataho abeebembezi aba Zebbuluni n'aba Nafutaali.

²⁸Ai Ruhanga, ragira obusobozi bwawe; ragira amaani gawe Ai Ruhanga, iwe ayatukoliire ebintu bingi, yoleka amaani gawe.

²⁹Habw'enju yawe enyakuli Yerusaalemu, abakama bakurabuka ebisembo.

³⁰Ohane enyamaiswa ezinyakwikara omu rubingo, igana ery'enimi hamu n'enyana ez'amahanga. Rubaatirra abo abanyakurrurukira omusoro; orarangye amahanga aganyakugonza muno obulemu.

³¹Oikirize omulinga gwihwe omunsi Misiri; oikirize Esopiya erahuke egororre Ruhanga emikono yayo.

³²Muzinire Ruhanga inywe amakama ag'ensi; Muzine muhaisanize MUKAMA,

³³Muzinire ogu anyakutembere iguru erya ira na ira; Muhurre nkooku arukubaza, naabaza n'iraka ery'obusobozi.

³⁴Murangirre obusobozi bwa Ruhanga; anyakwina ekitiinisa omu Isirairi, kandi anyakwina obusobozi oburukuhika haiguru.

³⁵Ruhanga atiinisa omukiikaro kye ekirukwera, Ruhanga owa Isirairi, anyakuha abantu be obusobozi n'amaani.