Read Runyoro - rutooro Zab 69 Bible Online

Zab 69 - Runyoro - rutooro bible

Zab 69

¹Ai Ruhanga onjune! Habwokuba amaizi gampikire omubikya

²Nindikira omu saabu enyakuhamire, nambere hatali h'okuta okuguru; mpikire omu nziha z'amaizi nambere hahamire, amaizi nigandaba ha mutwe eruguru.

³Kurra kwange kunjwahize; emimiro enyomere enkaraakaire amaiso gange, habw'okwikara ngagunwire ntegeeriize Ruhanga wange, gampimbaire.

⁴Abantu abannobere bataina bulyo, baingi muno nibakira isoke erya ha mutwe gwange; abo abaakugondeze kumpwerekereza, b'amaani, nubo abo abancwererra ebisuba. Eki ntaraibire, kimpikiriire.

⁵Ai Ruhanga, iwe omanyire obudoma bwange; ensobi zange tizikuserekerwe.

⁶Ai MUKAMA Ruhanga ow'amahe, otanyikiriza kuhemura abo abanyakwesiga; Ai Ruhanga owa Isirairi, otanyikiriza kuswaza abo abanyakukuserra.

⁷Habwokuba habwawe, nikyo ndukujumirwa, nikyo ndukukwatirwa ensoni eziraaliire kunyita.

⁸Hali abanyaruganda rwange, nfookere munyaihanga, hali abaana ba mau, nafooka nsuhuuki

⁹Habwokuba okugonza muno enju yawe, kukaamaraho kandi ebijumo by'abo abanyakujuma, bikagwera nyowe.

¹⁰Obu nyesaaliza ninsiiba njara, eki kindugiramu kijumo.

¹¹Obu nakwasire eguniya niyo nafoora kyokujwara, oru nurwo rwabaire rufumo orubancwaho.

¹²Ninyowe rujali rw'abo abanyakwikarra omu irembo. Kandi abatamiizi, ninyowe bacwererraho ebizina.

¹³Baitu Ai MUKAMA, nyowe nsaba iwe Ai Ruhanga, habw'engonzi zawe ezitayuga, ongarukemuga omukasumi akasemeriire. Habw'obukonyezi bwawe obubamu obwesige,

¹⁴onjune ntatobera omu saabu; onjune abanyanzigwa bange, kandi onyihe omu nziha y'amaizi.

¹⁵Omugezi guleke kundaba ha mutwe eruguru, enziha ereme kuumira, rundi ekiina kunjubata.

¹⁶Ai MUKAMA ongarukemu, habwokuba engonzi zawe ezitayuga, nungi; ompindukire habw'okuganyira kwawe okutagambwa

¹⁷Amaiso gawe otagasereka omwiru wawe; habwokuba, ndi omumuhito, otabandaara ongarukemu.

¹⁸Onyirre haihi oncungule, onjune abanyanzigwa bange.

¹⁹Niiwe omanyire okujumwa kwange, oteho okuhemurwa n'okuswazibwa kwange; abazigu bange boona obamanyire.

²⁰Ebijumo bincwacwaine omutima, nukwo kuhoibwa amasiko, nkaserra kugirirwa embabazi baitu eki kitabeho; kandi nkaseerra ab'okumpuumuza, baitu ntazoole n'omu.

²¹Omukiikaro ky'ebyokulya, bakampa obutwa, kandi obu nakwasirwe iroho endurwa niyo bampaire nanywa.

²²Ebyokulya byabo byonyini ebinyakuli Omumaiso gaabo, bibafookere mutego, amagenyi gaabo ag'ebyonzira, gabahindukire kiriba.

²³Amaiso gaabo nigakahume, nukwo baleme kuhweza; kandi ebibero byabo obirwaze entengetera.

²⁴Obataisurre obukaya bwawe, olekere ekiniga kyawe ekinyakwaka kibahikeho.

²⁵Ekiikaro kyabo nikikafooke itongo, hatabaho n'omu araara omu heema zaabo.

²⁶Habwokuba bakahiiganiza ogu ou watiire, kandi ogu ou wahutaize, nibakyamubonabonesa okukiraho.

²⁷Bafubire, hakifubiro ekimu nooyongeraho ekindi; batalitaaha omu bahikiriire bawe.

²⁸Baragazibwe omu kitabu eky'aboomeezi; batalihandiikwa hamu n'abahikiriire.

²⁹Baitu nyowe nimbonabonesibwa kandi ndi omu burumi Ai Ruhanga onyimukye habwobusobozi bwawe obunyakujuna!

³⁰Ndaazinaga ekizina ninkugiza ibara lya Ruhanga; ndaamuhaisanizaaga nimmusiima.

³¹Eki nikyo kirisemeza MUKAMA okukira kumuhongera endaawa, nikyo kirimusemeza kukira kumutambira enimi enyakwina amahembe n'enkangaasi.

³²Abarukucanzibwa murole eki, kandi musemererwe; inywe abanyakuserra Ruhanga, emitima yanyu eyomeere.

³³Habwokuba MUKAMA ahurra abaseege, kandi abe abanyakuli omu nkomo, tabagaya.

³⁴Iguru n'ensi bimukugize, amayanja na byona ebinyakugarumu nabyo nukwo bikole.

³⁵Habwokuba Ruhanga alijuna Siyoni kandi ayombeke buhyaka embuga za Yuda; abaheereza be nuho baliikara bagirye;

³⁶abaana b'abahereza be baligigweterwa kandi abo abanyakugonza ibara lye, nubo baligiikaramu.