Read Runyoro - rutooro Zab 7 Bible Online

Zab 7 - Runyoro - rutooro bible

Zab 7

¹Ai MUKAMA Ruhanga wange, niiwe bwirukiro bwange; onjune boona abankuraatiire nibambinga kandi onkize,

²Obu otanjune, nibaija kunkurra bantaagataagule, nk'entale, mbe bucwagalika, hataroho muntu n'omu asobora kunjunira.

³Ai MUKAMA Ruhanga wange, obu ndiba nakozire ekintu kinu, emikono yange obu ndiba nagikoleze ekibi,

⁴Obu ndiba nakoliire munywani wange ekibi, kandi kunu uwe ankoliire ekirungi, rundi obu ndiba nanyagire ebintu by'omunyanzigwa wange, ntaina bulyo,

⁵Oikirize omunyanzigwa wange ampambye ankwate arubaatirre obwomeezi bwange omwitaka, anjuumike omu cuucu.

⁶Ai MUKAMA, imuka oina ekiniga imukira kimu orwanise obukaya bw'omunyanzigwa wange, imuka Ai Ruhanga wange; niiwe wataireho kucwerwa omusango.

⁷Leka ekitebe ky'abantu kyesoroleze nambere oli, kandi okireme oikaliire haiguru muno.

⁸Ai MUKAMA, iwe oramura boona, oncweremu omusango ngusinge habwokuba omanyire tinyina kabi.

⁹Ai bambi, ohwerekereze obubi bw'ababi, baitu ogumye abahikiriire, iwe anyakwekebiija n'emitima n'amagezi, iwe Ruhanga Omuhikiriire.

¹⁰Ruhanga nuwe ngabu enyakundinda, anyakujuna ab'omutima ogusemiire.

¹¹Ruhanga omucwi w'emisango omwinganiza, tarahuka kwoleka ekiniga kye, baitu butoosa aba Ruhanga anyakubihizibwa abo abanga kwegarukamu.

¹²Omuntu kakuba ateegarukamu, Ruhanga ateekera empirima ye agemere obuta bwe yabuleega;

¹³ateekaniize ebyokurwanisa bye kaita, emisogi ye yagifoora mango ez'omurro.

¹⁴Omuntu omubi, atwara enda ey'obubi, alemeera n'ihali, azaara ebisuba.

¹⁵Alima obuhya buhama, ekiina eki yalimire wenka, nikyo agwamu.

¹⁶Itima lye limugaruka ha mutwe gwe, kandi obuhoogozi bwe bumusirimuka ha ruhorohozi,

¹⁷Ndaasiimaga MUKAMA, obuhikiriire bwe nkooku bumusemeriire, kandi ndaazinaga nimpaisaniza ibara lya MUKAMA, Anyakuli haiguru muno.