Read Runyoro - rutooro Zab 71 Bible Online

Zab 71 - Runyoro - rutooro bible

Zab 71

¹Ai MUKAMA, niiwe nyebinga, ebiro byona, otalindeka nkahemurwa!

²Onjune kandi oncungule habw'obuhikiriire bwawe; ontegere okutu onkize!

³Hali nyowe, obege mwandara gw'obwirukiro, kigo ekigumire eky'okujuna, habwokuba niiwe mwandara, kandi kigo kyange.

⁴Ai Ruhanga wange, onjune omu mukono gw'omubi, oncwe omu mikono y'omuntu atali mwinganiza, kandi ataina mbabazi.

⁵Habwokuba iwe Ai MUKAMA, niiwe kunihira kwange, Ai MUKAMA, okuruga omubuto bwange, niiwe bwesige bwange.

⁶Okuruga ninkyazaarwa nti, nkaigamira iwe niiwe wanyihire omunda ya mau. Ndaakuhaisanizaaga obutalekerra.

⁷Ha baingi, nkaba kintu ekihuniriza; baitu niiwe bwirukiro bwange obw'amaani.

⁸Ndaikaraga ninkukugiza, izooba lyona ndaakunyumizaaga

⁹Obu ndiba ngurusire otalinaga; amaani obu galimpwa otalindugaho.

¹⁰Habwokuba abanyanzigwa bange nibahaya abo abarukweserekerra obw'omeezi bwange, beeteraine nibahanurra hamu.

¹¹Kandi nibagamba bati, “Ruhanga akamuhemukira; mumuhambye mumukwate, habwokuba busaho n'omu ow'araamujuna.”

¹²Ai Ruhanga otanyema hara; Ai Ruhanga wange, orahuke onkonyere!

¹³Abarukunyegerra nibakahemurwe bakahwerekerra; abanyakugonza kunkora akabi, nibakagwe, kandi nibakaswazibwe.

¹⁴Baitu obutoosa ndaanihiraga omuli iwe, ndagendaga ninyeyongera okukukugiza.

¹⁵Akanwa kange karaatebyaga engeso zawe ez'obuhikiriire, izooba lyona, karasubirraga ebikorwa eby'okujuna kwawe, habwokuba omuhendo gwabyo, tinsobora kugumanya.

¹⁶Ndiija habw'ebikorwa eby'amaani ebya MUKAMA Ruhanga, ndihaisaniza okuhikirra kwawe, okwawe kwonka.

¹⁷Ai Ruhanga, okuruga omu buto bwange niiwe wanyegeseze, na hati hoona, ninkyarangirra ebikorwa byawe ebihuniriza.

¹⁸Ai Ruhanga, noobu ndigurusa nkamera enju, otalindugaho, okuhika obu ndikarangirra obusobozi bwawe abantu boona abiro ebirukwija. Ai Ruhanga, obusobozi

¹⁹n'obuhikiriire bwawe, bihika haiguru iwe ayakozire ebintu ebikuru, n'oha akusisana?

²⁰Iwe ayamboneseze emihito enyingi etagambwa, otaligaruka onyomeeze.

²¹Olinyongera ekitiinisa kandi ogaruke ompuumuze.

²²Kandi ndaakukugizaaga ninteera enanga, Ai Ruhanga wange, habw'obwesige bwawe, ndaazinaaga eby'okukugiza ninteera enanga Iwe Omuhikiriire owa Isirairi.

²³Obu ndaabaga ninzina ebyokukukugiza, eminwa yange eraatokaga habw'omuhimbo; oteho n'obwomezi bwange obu wacungwire.

²⁴Kandi izooba lyona, orulimi rwange ruraabazaaga ha bukonyezi bwawe obuhikiriire, habwokuba, abaagondeze kunkora akabi, bakahemurwa kandi baswazibwa.