Read Runyoro - rutooro Zab 73 Bible Online

Zab 73 - Runyoro - rutooro bible

Zab 73

¹Mananukwo, Ruhanga aba murungi ha bantu abatereekeriire hali abo ab'omutima ogurukwera.

²Baitu nyowe nkaba nahwa amasiko, Okwikiriza kwange, kake konka kumpweremu kimu.

³Habwokuba, obunarozire ababi nkooku barukutunga omugisa nkakwatirwa ihali abemyehembo.

⁴Habwokuba tibagira eki basaaliza; emibiri yabo nyomeezi kandi neemetameeta.

⁵Tibagira mihito nk'abantu abandi ei bagira; tibasaalizibwa nk'abantu abandi oku basaalizibwa;

⁶Habweki, emyehembo, nugwo omufubaso bajwara omubikya; obukatuzi nikyo ekyokujwara ekibaswekerra.

⁷Amaiso gaabo gazimbisiibwe ebisajwa, emitima neebooga obudoma.

⁸Basekereza kandi babaza n'itima; bahaya kubonabonesa abantu n'emyehembo.

⁹Akanwa kaabo bakoolekiize iguru, kandi orulimi rwabo, nirurabangana omunsi nibateekereza bati, akanwa kaabo bakooleka iguru, kandi orulimi rwabo rwina obusobozi obw'okuragira omunsi.

¹⁰Abantu bange nikyo barukugendera nambere bali, bakaikiriza byona ebi barukugamba. Abantu nukwo kuhinduka bakabanyumiza; kandi nikyo batarukubarorraho musango.

¹¹Kandi nibagamba bati, “Ruhanga alimanya ata? Ogu anyakuli haiguru muno, agira amagezi?”

¹²Murole, abantu ababi; obutoosa habw'okwikara aho bagaramire, bagenda nibeeyongera itungo.

¹³Nkalinda omutima gwange gwikale nigwera, n'okufuuhya obubi bwona, nkajwahira busa.

¹⁴Habwokuba, izooba lyona, nsiiba nimbonabonesibwa, kandi obwire obu buba nibukya, ntandika kufubirwa.

¹⁵Obu naakubaire ngambire nti, Ka mbaze nti, tinaakubaire w'amananu ha ruzaaro orw'abaana bawe.

¹⁶Baitu obu nateekeriize nkooku ndaayetegereza kinu kikanzookera nkooku guli mulimo gw'amaani;

¹⁷okuhika obu nakataahire omukiikaro kya Ruhanga ekirukwera nubwo nayetegeriize ekyayahuliirwe ababi.

¹⁸Mananukwo, niwe wabataire omubiikaro ebirukuterra; niwe wabahambiriize omu kuborogota.

¹⁹Mawe, kanukwo bahwerekerra omu kacu kake, ebintu ebikanga kanukwo babasingolerra kimu!

²⁰Nibasisana nk'ekirooto, omuntu obu asisimuka obu osisimuka, ogaya ebi oroosire.

²¹Omwoyo gwange obu gwansaaliire, obu nacumisirwe omu mutima,

²²nkaba mudoma kandi ntaami, hali iwe nkasisana nk'enyamaiswa.

²³Baitu nabwo obutoosa, ndaikaraga na iwe; niiwe orankwataga hamukono.

²⁴Onyebemberege n'amagezi gawe, kandi hanyuma, olinyikiriza kutaaha omu kitiinisa kyawe.

²⁵Okwihaho iwe, omwiguru nyinamu oha? Kandi okwihaho iwe, omunsi busamu kintu na kimu eki nyitanira.

²⁶Omubiri n'omutima gwange, bisobora kulemwa baitu Ruhanga nuwe maani ag'omutima gwange, kandi nugwo mugabo gwange ebiro n'ebiro.

²⁷Habwokuba, dora abo abanyakuli hara, balihwerekerra; abo abanyakukugobeza, obabuuleeza.

²⁸Baitu nyowe ekindetera omuhimbo, nukwo kwikara haihi na Ruhanga MUKAMA Ruhanga, nuwe nafoire bwirukiro bwange, nukwo nsubirre emirimo ye yoona.