Read Runyoro - rutooro Zab 74 Bible Online

Zab 74 - Runyoro - rutooro bible

Zab 74

¹Ai Ruhanga, habwaki otunagira kimu oti ebiro byona? Habwaki ekiniga kyawe kiimukiramu entaama ez'isibiko lyawe?

²Oijuke ekitebe kyawe eki watungire ira, eki wacungwiire kibe ruganda orw'obugwetwa bwawe.

³Gendera kimu otereekeriire ohike ha bikambuuro eby'ebiro n'ebiro; byona eby'omu kiikaro ekirukwera, omunyanzigwa akabihwerekereza!

⁴Abanyanzigwa bawe bakaamuliza omukiikaro kyawe ekirukwera; baahanikamu ebendera zaabo, nikyo kyokumanyisa nkooku basingwire.

⁵Baasisanaga abanyakibira abakaba nibatema emiti n'endemu zaabo, orucebeya orw'emiti orukaba ruli ha irembo ery'eruguru, baarutematema n'embaizi.

⁶Hanyuma omuti gwarwo ogukaba gusarwirwe, baaguseesa n'endemu n'enyondo.

⁷Ekiikaro kyawe ekirukwera baakicumika omurro; ekiikaro eky'ibara lyawe baakiseesira kimu ha itaka baakihagaza.

⁸Baagambirangana bati, “Tubajeemurre kimu”; amasorrokaniro ga Ruhanga goona ag'omunsi egi, bakagookya.

⁹Emanyikirizo zaitu titurukwibona; tihakyaroho murangi n'omu, kandi omuli itwe, busaho n'omu anyakumanyire akasumi tulimara tutaina murangi.

¹⁰Ai Ruhanga, omuzigu, alisekeereza kuhika nkaha? Ebiro byona, omunyanzigwa araikaraga naajuma ibara lyawe?

¹¹Habwaki oyanga kugira ekiwakora omukono gwawe ogw'obulyo, noogweteera ki omukifuba?

¹²Baitu nabwo, Ruhanga omukama wange, wa ira, omunsi hagati, nuho njunira abantu.

¹³Niiwe wabaganiize enyanja n'obusobozi bwawe; niiwe wayatangwiire emitwe y'ebijoka.

¹⁴Niiwe wabberengwire emitwe y'enjoka wagigabira ebihangwa eby'omwirungu kugirya.

¹⁵Niiwe waigwire engezi n'obwambu; emicungiro eyaikaraga neegera kara na kara, niiwe wagyomiize kimu.

¹⁶Nyamusana yawe, ekiro nakyo kyawe; niiwe wataireho ebijwa byona n'izooba.

¹⁷Niiwe wataireho emitaano y'ensi;

¹⁸Ai MUKAMA oijuke ekintu kinu, omunyanzigwa nkooku arukusekeereza, kandi abantu abatagonza Ruhanga nkooku barukujuma ibara lyawe.

¹⁹Abantu baawe otabahayo hali abanyazigwa baabo. Enyamaiswa ez'omu kisaka; ebiro byona, otalyebwa obwomeezi bw'omunaku wawe.

²⁰Otemu endagaano yawe ekitiinisa, habwokuba ebiikaro eby'omwirima eby'omunsi enu, nubwo obwikaro obunyakwijwire ekikaturo.

²¹Otaleka anyakwenderezibwa kuswazibwa; oikirize omunaku n'omuseege bakugize ibara lyawe.

²²Ai Ruhanga, oimuke oyerwaniirre; izooba lyona oijuke entagonza Ruhanga, nkooku bakusekeereza.

²³Oteebwa obwogo obw'abanyanzigwa bawe oteebwa akamburumburu k'abanyanzigwa bawe, obutoosa, akaikara nikeeyongera.