Read Runyoro - rutooro Zab 78 Bible Online

Zab 78 - Runyoro - rutooro bible

Zab 78

¹Inywe abantu bange, mutege amatu muhurre okwegesa kwange; muhunde amatu gaanyu muhurre ebigambo by'akanwa kange!

²Ndabaliza omu rufumo; Ndaayatura ebigambo by'amasano ninsigikira omu byaira,

³ebintu ebi twamazire kuhurra kandi ebimanyirwe, ebi ebitwagambiirwe ba isenkurwitwe.

⁴Titulibisereka abaana baabo, baitu tulibigambira abebiro ebyomumaiso ebikorwa eby'ekitiinisa MUKAMA ebi yakozire, n'obusobozi bwe, kandi n'ebihuniriza ebi yakozire.

⁵Akataho obwakaiso omu Yakobbo yateeraho Isirairi ebiragiro, naaragira baisenkuruitwe kubyegesa abaana baabo.

⁶Nukwo ab'obusinge bw'Omumaiso babimanye, abaana abatakazairwe. Kandi nabo bongere babigambire abaana baabo.

⁷Nukwo okunihira kwabo kube omuli Ruhanga, kandi baleke kwebwa emirimo ya Ruhanga, baitu bagumire ha biragiro bye;

⁸kandi bataliba nka baisenkurubo, abeereme kandi abeemi, abantu abakaba bataine omutima gugumire, omwoyo gwabo gukaba gutali mwesigwa hali Ruhanga.

⁹Abaana b'Efuraimu, abaakwataga obuta, bakagaruka ha kiro ky'obulemu.

¹⁰Batalinde endagaano ya Ruhanga, bayanga kugendera omu biragiro bye.

¹¹Bakeebwa ebi eby'akaba akozire, n'ebyamahano ebyakaba amazire kubooleka.

¹²Akakora ebihuniriza Omumaiso g'abaisenkurubo, omunsi Misiri, omu byeya bya Zohani.

¹³Akabaganizaamu enyanja bagirabamu, amaizi yagafoora nk'omutuumo.

¹⁴Omubwire bwa nyamusana yabeebeembezaaga ekicu, kandi omu bwire bw'ekiro bamulikirwaga ekyererezi ky'omurro.

¹⁵Akaata omwandara omwirungu, kandi yabaha amaizi omu bwingi nigaruga omunziha.

¹⁶ Ebisaaru akabigeza nibiruga omumwandara, amaizi gaagera nk'ebisaaru.

¹⁷Baitu na bwo bakeeyongera kumusiisira, nibeemera Anyakuli haiguru muno omwirungu.

¹⁸Bakalenga Ruhanga omu mitima yabo nibasaba ebyokulya ebi bayegombere

¹⁹Bakabaza kubi hali Ruhanga nibagamba bati: “Ruhanga nasobora kutusembereza ebyokulya omwirungu munu?

²⁰Akaata omwandara amaizi gataraaka n'ebisaru byagera. Ekindi nasobora kutuha ebyokulya, n'okutugabira enyama?”

²¹Nahabweki, MUKAMA obuyakihuliire, akakwatwa ekiniga; Yakobbo akahemberwa omurro obukaya bwe bwahikaho Isirairi.

²²Habwokuba bakaba bataine kwikiriza Ruhanga, kandi bakaba batarukwesiga obusobozi bwe obwokujuna.

²³Baitu nabwo akaragira iguru haiguru, yakingura enyigi z'iguru.

²⁴Kandi akabasindikira maanu baalye, yabaha n'ebyokulya kuruga omwiguru.

²⁵Abantu bakalya ebyokulya bya Bamalaika; akabatwekera ebyokulya omu bwingi.

²⁶Omuyaga gwa Burugaizooba akaguragira guhugute omwiguru,, kandi habw'obusobozi bwe akaragira omuyaga gw'omumasirimuka gwarugayo;

²⁷abantu be akabatwekera ebinyonyi habw'enyama, ebinyonyi eby'amapapa byasisana omusenyi gw'enyanja,

²⁸akabiragira byagwa omu rukande rwabo, na hoona nambere baikaraga.

²⁹Kandi bakalya baiguta, habwokuba akabaha eki baayetaagaga.

³⁰Baitu batakasoboroire eki bayetaagaga, ebyokulya obu bikaba bikyali omu kanwa kaabo,

³¹ekiniga kya MUKAMA kikaaka nubwo yatemere omuli bo abaakirraga kimu amaani, yabundaaza abatongorwa ba Isirairi.

³²Ebi noobu byabaireho bakeeyongera kusiisa; noobu habaireho ebyokuhuniriza bye, nabwo bataikirize.

³³Ebiro byabo nubwo yabibulizeeho nkorwoya, n'emyaka yabo ekaba y'epumpu.

³⁴Obu yabatemere, bakaserra; bakeegarukamu baserra Ruhanga muno.

³⁵Bakaijuka Ruhanga nkooku akaba ali mwandara gwabo. Ruhanga anyakuli haiguru, muno, omucunguzi wabo.

³⁶Baitu bakamujahiriza n'ebigambo eby'akanwa kaabo; bamubiiha n'endimi zaabo.

³⁷Emitima yabo ekaba etamugumireho; bakaba batarukwesiga ekiragaano kye.

³⁸Baitu noobu kiraaba kyabaire kiti, uwe habwokuba aba muganyizi, akabaganyira obubi bwabo, tiyabahwerekereza emirundi nyingi yakeehyaga okubiihirwa kwe, ekiniga kye kyona, tiyakyolekaga,

³⁹Akaijuka nkooku bakaba bali bantu nyabuntu, muyaga ogunyakuteera gukahingura, gukalema kugaruka.

⁴⁰Omwirungu, bakamwemera emirundi ingaha, kandi omu ibuga, bakamusaaliza kaingaha?

⁴¹Bakamulenga nibakigarukanganamu kandi bakabiihiza Omuhikiriire Ogu owa Isirairi.

⁴²Bakeeberwa kimu obusobozi bwe, n'ekiro eki yabajuniireho abanyanzigwa baabo.

⁴³Eki yakoliireho eby'amahano bye omunsi Misiri, n'ebihuniriza bye omu byeya bya Zohani.

⁴⁴Ebisaaru byabo akabifoora sagama, nukwo baburwe amaizi ag'okunywa.

⁴⁵Akabasindikamu emizinga ey'ensohera, eyabahwerekeriize, n'ebikere ebyabasisiire ensi.

⁴⁶Ebirimwa byabo akabiriisa empuuhira kandi ebijuma ebi batatuntuliire yabiriisa enzige.

⁴⁷Emizabbibbu yabo akagihwerekereza n'orubaale, emitini yabo yagicwekereza n'ebirika.

⁴⁸Ente zaabo akaiteeza orubaale, kandi amagana gaabo ag'embuzi, yagateeza enkuba.

⁴⁹Ekiniga kye ekirukutiinisa, obukaya, okubiihirwa; n'emihito, nikyo ekitebe ky'abamalaika kahwerekereza.

⁵⁰Ekiniga kye atakitange atasobole kubaganyira orufu baitu akabahayo baitwa kagingo.

⁵¹Akaita emizigaijo yoona eya Misiri, abarukukira amaani omu heema za Haamu.

⁵²Nubwo yayebembiire abantu be nk'omuliisa okwayebembera entaama yabarabya omwirungu nk'igana.

⁵³Akabebembera omu businge kandi batatiine; baitu enyanja ekamirra kimu abanyanzigwa baabo.

⁵⁴Akabaleeta omunsi ye erukwera, ha nsozi ezaakaba asingwize omukono gwe ogw'obulyo.

⁵⁵Akabingamu amahanga nibarora; yabagabiramu ensi nukwo bagiikalemu enganda za Isirairi yaziha amaju.

⁵⁶Baitu nabwo bakalenga kandi baayemera Ruhanga Anyakuli haiguru muno, batagendere omu Biragiro bye,

⁵⁷baitu bakahinduka bakora eby'obucwangya nka baisenkurubo; bakeehotora nk'obuta obutarukwesigwa.

⁵⁸Habwokuba bakamukwasa ekiniga n'ebiikaro byabo ebyokuramizaamu ebiraihire, baamuleetera ihali n'ebisisani byabo ebisarwirwe.

⁵⁹Ruhanga obu yakirozire, akaijura obukaya, akaangira kimu Isirairi.

⁶⁰Akeehooga ekiikaro yaikaramuga omu Siiro, eheema yaikaramuga omu bantu,

⁶¹akaikiriza abanyanzigwa baitu kunyaga esanduko y'ekiragaano, akookurorraho k'obusobozi n'ekitinisa kye.

⁶²Akahayo abantu be kwitwa empirima Obugwetwa bwe yabwoleka obukaya.

⁶³Omurro gukahwerekereza abasigazi baabo, abaisiki baabo baabura ab'okubaswera.

⁶⁴Baanyakatagara baabo bakaitwa empirima kandi abafaakati baabo batateere empamo.

⁶⁵Ruhanga nubwo yasisiimukire nkarukuruga omu turo, nk'omusaija ow'amaani arukutokesibwa etamiiro.

⁶⁶Abanyanzigwa yababinga naabagarrayo enyuma; boona abarwaize okuswara okw'ebiro byona.

⁶⁷Akaanga abaijukuru ba Yosefu, oruganda rwa Efuraimu tiyarukomamu;

⁶⁸baitu akakomamu oruganda rwa Yuda, orusozi Siyoni orw'agonza.

⁶⁹Akombeka ekiikaro kye ekirukwera nakisisaniza nk'ekikaro eky'omwiguru, yakigumya nk'ensi ei yagumize ebiro byona.

⁷⁰Akakomamu Daudi omwiru we, naamwiha omu maliisizo g'entaama.

⁷¹Naamwiha omu kuliisa entaama ezikaba zinyina ebyaana yamuleeta afooke muliisa wa Yakobbo n'abantu be owa Isirairi obugwetwa bwe.

⁷²Akabaliisa aine omutima ogusemiire, kandi yabeebembera n'amagezi.