Read Runyoro - rutooro Zab 86 Bible Online

Zab 86 - Runyoro - rutooro bible

Zab 86

¹Ai MUKAMA, ontegere okutu ongarukemu, habwokuba ndi munaku kandi ndi museege.

²Olinde obwomeezi bwange, habwokuba ngonza Ruhanga; juna omwiru wawe anyakukwesiga.

³Niwe Ruhanga wange; Ai MUKAMA, ongirre embabazi habwokuba, izooba lyona nsiiba ninkulirirra.

⁴Ai MUKAMA ijuza omwoyo gw'omwiru wawe omuhimbo habwokuba, hali iwe nuho ngwimukiza.

⁵Habwokuba iwe, Ai MUKAMA, oba murungi kandi muganyizi, munyangonzi nyingi ezitayuga, hali abo boona abanyakukukunga.

⁶Ai MUKAMA, ontegere okutu ohurre okusaba kwange ohulirize omukungo ogw'okwesengereza kwange.

⁷Obu mba omu muhito, nkukunga, baitu iwe ongarukamu.

⁸Ai MUKAMA omu ba ruhanga busaho n'omu akusisana, rundi ayakozire ebintu nk'ebi wakozire.

⁹Ai MUKAMA amahanga goona aga wahangire, galiija gakuramye, kandi galinyumiza ibara lyawe.

¹⁰Habwokuba oli w'ekitiinisa kandi okora ebintu ebihuniriza, iwe wenka niwe Ruhanga.

¹¹Ai MUKAMA, onyegese omuhanda gwawe, nukwo ndubatire omu mananu gawe; okumakume omutima gwange, nukwo gutiine ibara lyawe.

¹²Ai MUKAMA Ruhanga wange, ninkusiima n'omutima gwange gwona, kandi ndakugizaaga ibara lyawe ebiro byona.

¹³Habwokuba engonzi zawe ezitayuga, hali nyowe tizigambwa; niwe wajunire omwoyo gwange wagwiha okuzimu Nyabuyonga.

¹⁴Ai Ruhanga, abantu ab'emigayo banyimukiriire; ekitebe ky'abantu abatagira mbabazi nibaserra kunyita, kandi iwe tibakuroho.

¹⁵Ai MUKAMA, baitu iwe, niwe Ruhanga omuganyizi kandi omunyambabazi, atabiihirwa bwango, kandi ow'engonzi enyingi ezitayuga kandi omwesigwa.

¹⁶Ompindukire kandi onganyire; omwiru wawe omuhe amaani gawe kandi ojune omwana w'omuzaana wawe.

¹⁷Onyoleke akarorwaho ak'embabazi zawe, abo abanyakuunoba, nukwo barole kandi baswazibwe, habwokuba iwe MUKAMA, niwe wankonyiire wampuumuza.