Read Runyoro - rutooro Zab 88 Bible Online

Zab 88 - Runyoro - rutooro bible

Zab 88

¹Ai MUKAMA Ruhanga wange, buli kiro nkweta ninkusaba obukonyezi; omu bwire bw'ekiro nkuliriirra:

²Otegere okutu okurra kwange, okusaba kwange nukwo kuhike nambere oli

³Habwokuba omwoyo gwange gusagaine emihito, obwomeezi bwange bwiriire haihi na Nyabuyonga.

⁴Nimbalirwa omuli abo abasirimuka omu Kiina; ndi muntu atanyina maani.

⁵Ndi nk'omuntu anyakulekerwe omu bafu, ninsisana nk'omutumbi ogunyakubyamire omu kituuro, ninsisana n'abo abootakyayongera kwijuka, habwokuba tibakyatunga bukoonyezi bwawe.

⁶Onteriire kimu omu kiina okuzimu, omu biikaro ebiijwire omwirima kandi ebihamire.

⁷Ekiniga kyawe nikinyigatira muno, Ombutikiire n'ebigonzi byawe byona.

⁸Oleeteriize enganjani zange kunyetantara; hali bo onfoire kintu ky'okunugwa. Nkingiirwe omu nkomo tinsobora kucwa;

⁹Habw'obujune amaiso gange garumu omwirima. Ai MUKAMA buli kiro nkukunga; nkwanjururra emikono.

¹⁰Abafu obakorra ebyamahano? Ebiituuru biimuka bikukugiza?

¹¹Engonzi zaawe ezitayuga, zimanywa omu kituuro, rundi obwesige bwawe butebezibwe nyabuyonga?

¹²Ebyamahano byawe bimanywa omu mwirima, rundi obukonyezi bwawe obunyakujuna bwetegerezibwa omunsi ey'okwebwa?

¹³Ai MUKAMA, baitu nyowe nkuliriirra; buli nyenkya nkusaba.

¹⁴Ai MUKAMA habwaki onyecwaho? Habwaki onsereka amaiso gaawe?

¹⁵Okuruga omu buto bwange, nyikara nimbonabona kandi ninyiriirra okufa. Mbonesibwa ebintu byawe eby'okutiinisa; tinyina kikoonyera.

¹⁶Ekiniga kyawe kikahwera hali nyowe, wampwerekereza n'ebintu byawe ebinyakutiinisa.

¹⁷Bikanyehinguliriza izooba lyona; byona bikankiingirra hamu.

¹⁸Okaleetereza banywani bange n'abataahi bange kunyecwaho, hati mutaahi wange ou nsigaize nugwo omwirima.