Read Runyoro - rutooro Zab 89 Bible Online

Zab 89 - Runyoro - rutooro bible

Zab 89

¹Ai MUKAMA, ndaazinaga ha ngonzi zaawe ezitayuga ebiro byona. Ndaarangirraga obwesige bwawe ebiro n'ebiro.

²Habwokuba engonzi zaawe ezitayuga ikagumibwa ziikaleho ebiro byona; obwesige bwawe bugumire nk'iguru.

³Niiwe wagambire oti: “Nkakora endagaano n'ogu ou nakomere nkarahira Daudi omwiru wange nti:

⁴‘Ndigumya abaijukuru baawe ebiro byona, kandi ndyombeka ekitebe ky'obukama bwawe ebiro byona.’ ”

⁵Ai MUKAMA, iguru kalihaisa ebyamahano byawe ka likugize obwesige bwawe omu kitebe ky'abantu abarukwera!

⁶Obu, omwiguru n'oha asobora kulengesanizibwa na MUKAMA? Omu bintu eby'omu burangasa nikiha ekirukusisana MUKAMA?

⁷Ruhanga nyakutiinwa omu rukurato rw'abahikiriire, Ow'ekitiinisa kandi anyakutiinwa okukira boona abanyakumwehinguliriize?

⁸Ai MUKAMA Ruhanga Ow'amahe, n'oha aina obusobozi oburukwingana nk'obwawe? Ai MUKAMA omu bintu byona oba mwesigwa.

⁹Niiwe olema okuswakira kw'enyanja; ebigonzi byayo obu biimuka, niiwe obiculeeza.

¹⁰Niiwe wacebacebere Rahabbu, nk'omutumbi. Okararangya abanyanzigwa baawe n'omukono gwawe ogw'obusobozi.

¹¹Iguru n'Ensi byawe; ensi na byona ebigirumu, niiwe wabikozire.

¹²Amatemba n'amasirimuka, niiwe wabihangire; orusozi Tabbora na Hamoni zikugiza ibara lyawe n'omuhimbo.

¹³Oina omukono ogw'obusobozi; amaani gaawe maingi muno.

¹⁴Obuhikiriire n'obwinganiza nibyo musingi gw'ekitebe kyawe eky'obukama; engonzi ezitayuga n'obwesige nibyo bikwebembera.

¹⁵Baine omugisa abantu abanyakukuramya nibazina ebizina, Ai MUKAMA, abo abanyakugendera omu kyererezi ky'amaiso gaawe,

¹⁶abanyakusemerererwa omu ibara lyawe okwiza obwire kandi abanyakuhaisaniza obuhikiriire bwawe.

¹⁷Habwokuba niiwe kitiinisa ky'amaani gaabo; omu ngonzi zaawe otufoora basinguzi.

¹⁸Habwokuba engabu yaitu eba MUKAMA wenka, Ruhanga Omuhikiriire owa Isirairi, akatuha omukama waitu.

¹⁹Omu biro bya kara, wabazaaga omu kwolekwa hali abairu baawe noogamba oti: “Ntaire ekondo hali ogu ow'obusobozi; ekitebe ky'obukama, nkihaire ogu ou nakomeremu omu bantu.

²⁰Nsoroiremu Daudi omwiru wange; namuseesaho amagita gange agarukwera.

²¹Nukwo omukono gwange gwikalege na uwe obusobozi bwange buramufooraga w'amaani.

²²Omunyanzigwa talimugobeza, ababi tibalimusingura.

²³Ndicwacwana abanyanzigwa be Omumaiso ge kandi nditeera hansi abo abanyakumunoba.

²⁴Obwesige n'engonzi zange ezitayuga biraikaraga hali uwe, buli kasumi ndaamufooraga Musinguzi.

²⁵Ndigalihya obukama bwe, kurugira kimu ha nyanja enkooto kuhika ha kisaaru Efuraate.

²⁶Arandirirraga naagamba ati: ‘Niiwe Ise nyowe, Ruhanga wange, omwandara ogw'okujunwa kwange.’

²⁷Ndimufoora omuzigaijo wange omwojo ndimufoora omukama arukukirra kimu abakama boona aba hansi.

²⁸Ndaikaraga nimugonza ebiro byona, kandi endagaano yange eraikaraga egumire.

²⁹Obugweterano bwe bw'obukama buraikarahoga ebiro n'ebiro; omwijukuru we araikaraga nafooka omukama.

³⁰Baitu abaijukuru be obu balyemera ebiragiro byange, batarukubyerinda,

³¹obu balinagaija eby'okwegesa kwange, batarukulinda ebiragiro byange,

³²obu, nubwo ndibafubira n'oruga, habw'ebibi byabo; kandi ndibateeza kibbooko habw'obubi bwabo.

³³Baitu Daudi tindireka kumugonza, rundi tindihemuka nkamwihaho omurago namuraganiize.

³⁴Tindicwa endagaano nakozire na uwe, noobukwakuba kuhingisa ekigambo eki nagambire.

³⁵Nindahira ibara lyange erirukwera okuruga hati n'ebiro byona; Daudi tindimubiiha bisuba.

³⁶Abaijukuru be baraikarahoga ebiro byona, nkooku izooba litaihwaho n'ekitebe ky'obukama bwe nukwo kiraikarahoga.

³⁷Akasumi koona, iguru akalirimara likyaroho, ekitebe ky'obukama bwe kirigumaho nk'okwezi, nukwo bwakaiso obw'amananu obunyakuli haiguru.”

³⁸Baitu hati, obihiriirwe omukama waawe ou wakomere; omurugireho kandi omwangire.

³⁹Endagaano yaawe n'omwiru waawe, okagicwa; ekondo ye okagikulinga omucuucu

⁴⁰Ohenzire ebisiika bye byona; ebigo bye obifoire bikamburo.

⁴¹Boona abarukuhingura nibamunyaga; afookere kintu ekirukugaywa abataahi.

⁴²Okaha abanyanzigwa be obusinguzi; boona okabaha kukyanganuka.

⁴³Okaita obwogi obw'empirima ye, tiwamukonyera omubulemu.

⁴⁴Omwigo gw'obukama okagumwiha omungaro; wanaga hansi ekitebe ky'obukama bwe.

⁴⁵Okakeehya ebiro eby'obusinguzi bwe;

⁴⁶Ai MUKAMA, olihikya nkaha? Oliikara oyeserekere ebiro byona? Ekiniga kyawe kirihikya nkaha kwikara nikyaka nk'omurro?

⁴⁷Ai MUKAMA, oijuke obwomeezi nambere bwingana, habwaki abantu wabahangiire ekitaina mugaso!

⁴⁸Muntu ki ogu ow'asobora kwomeera akalema kufa? N'oha ow'asobora kwejuna obusobozi bwa Nyabuyonga?

⁴⁹MUKAMA, engonzi zaawe ezitayuga eza kara eziwarahiriire Daudi, ziri nkaha?

⁵⁰Ai MUKAMA oijuke nyowe omwiru waawe nkooku ndukujumwa,

⁵¹Ai MUKAMA, abanyanzigwa baawe ebi barukujuma, ebi barukutebura omuseeswaho magita waawe, hoona nambere arukugenda.

⁵²MUKAMA asiimwege ebiro byona! Nukwo kibe kandi nukwo kibe!