Read Runyoro - rutooro Zab 9 Bible Online

Zab 9 - Runyoro - rutooro bible

Zab 9

¹Ndisiima MUKAMA n'omutima gwange gwona, ndaasubirraga ebikorwa byawe ebihuniriza.

²Ndisemererwa kandi nyenyumirize omuli iwe, ndizina nimpaisaniza ibara lyawe, Iwe anyakuli haiguru muno.

³Abanyanzigwa bange obu baagarukire enyuma, bakeesiitara baatabaijuka baahwerekererra Omumaiso gawe.

⁴Habwokuba, okalinda obulyo bwange obw'obwinganiza; okasinga ha kitebe eky'obukama, wacwa omusango omu bwinganiza.

⁵Okahana amahanga, wahwerekereza ababi; okaragaza ibara lyabo, lihwereho kimu ebiro n'ebiro.

⁶Abanyanzigwa bakahwererra omu bikambuuro eby'ebiro n'ebiro; embuga zaabo okaimenya; Okwijukwa kwabo kukahweraho kimu.

⁷Baitu MUKAMA aikaliire ahangiriize ebiro n'ebiro, agumize ekitebe kye eky'okucweraho emisango;

⁸nacwera ensi yoona omusango omubwinganiza, naaramura abantu omumananu.

⁹MUKAMA nuwe kigo ky'abarukubonabonesibwa, nubwo obugumizo omu kasumi k'omuhito.

¹⁰Abo abanyakumanyire ibara lyawe bakwesiga, habwokuba iwe MUKAMA, tokahemukiraga abanyakukuserra.

¹¹Muhaisanize MUKAMA anyakwikara Siyoni! Musubirre amahanga ebikorwa bye eby'amaani!

¹²Habwokuba ogu anyakuhoora esagama abaijuka; tayebwa mukungo gw'abarukubonesibwa.

¹³Onganyire Ai MUKAMA! Orole abo abaanobere nkooku barukumbonesa, Ai, Iwe anyakumpimba okaanyiha omumalembo ga rufu,

¹⁴nukwo nsobole okukuhaisaniza, ndangiirre ebyamahano byawe ha bantu ba Yerusaalemu nsemeriirwe habwokuba okanjuna.

¹⁵Amahanga gakadikira omubuhya obugaalimire; akatimba aka gaaserekere, ebigere byago nuho bikwatiirwe.

¹⁶MUKAMA ayemanyisize, acwire omusango ababi bakwasirwe ebintu ebibaayekoliire n'emikono yabo yonyini

¹⁷Ababi nibakasirimuke Nyabuyonga, amahanga goona aganyakwebwa Ruhanga.

¹⁸Habwokuba abaseege Ruhanga talibeberwa kimu. N'okunihira kw'abanaku tikulihweraho kimu.

¹⁹Imuka Ai MUKAMA, hatabaho omuntu asingura; amahanga niiwe ogacwere omusango.

²⁰Gakange Ai MUKAMA! Gamanyise nkooku bali bantu kwonka!