Read Runyoro - rutooro Zab 90 Bible Online

Zab 90 - Runyoro - rutooro bible

Zab 90

¹Ai MUKAMA, oikara oli bwikaro bwaitu ebiro byona,

²Ensozi obu zikaba zitakahangirwe, rundi obu okaba otakahangire ensi na byona ebigirumu, ebiro byona, okaba oli Ruhanga.

³Omuntu omugarra omu cuucu nomugambira oti: “Garukayo nambere warugire”

⁴Habwokuba hali iwe emyaka rukumi eri nk'ekiro kimu, eri nk'ekiro ekyahingwire ijo, rundi nk'ekisiisimuko eky'omubwire bw'ekiro.

⁵Osingorra abantu, omugezi nkooku gusingorra ebintu; basisana nk'ekirooto, basisana nk'obunyansi obunyakumera nyenkya kara:

⁶obunyakwaruka kandi obunyakwakya omu bwire bwa nyenkya, obunyakuhotoka kandi obunyakwoma izooba litakagwire.

⁷Habwokuba tuhwerekerezibwa ekiniga kyawe; kandi tumalirwaho kimu obukaya bwawe.

⁸Obubi bwaitu okabuta omumaiso gaawe, ebibi byaitu eby'ensita wabita omu kyererezi eky'amaiso gaawe nambere bisobora kurolerwa.

⁹Habwokuba ebiro byaitu byona bihingura otukwatiirwe ekiniga, emyaka yaitu ehwaho nk'okukoimya kw'eriso.

¹⁰Emyaka ei tumara eba nsanju, obu tuba tuli b'amaani ehika kinaana; baitu emyaka egi eba y'emigado kandi y'emihito; ehwaho bwango, naitwe tweba.

¹¹N'oha asobora kuteekereza obusobozi bw'ekiniga kyawe, n'oha anyakumanyire obutiini obuleetwa obukaya bwawe?

¹²Hati nu, otwegese okubara ebiro byaitu nukwo tusobole kutunga omutima ogw'amagezi.

¹³Ai MUKAMA, garuka! Olitubiihirirwa kuhika nkaha? Ganyira abairu baawe!

¹⁴Buli nyenkya otwijuze engonzi zaawe, nukwo twikale nituzina kandi nitusemererwa obwomeezi bwaitu bwona.

¹⁵Otuhe okusemererwa okurukumara ebiro bingi ebirukwingana neebi ebi watubonesiizemu, n'emyaka nyingi erukwingana neegi ei twaboniiremu emihito.

¹⁶Emirimo yaawe leka erolerwe omubairu baawe, n'ekitiinisa eky'obusobozi bwawe, kirolerwe omu baana baabo.

¹⁷MUKAMA Ruhanga waitu, otuhe omugisa gwawe, byona ebitukora obifoolege by'obusinguzi.