Read Runyoro - rutooro Zab 92 Bible Online

Zab 92 - Runyoro - rutooro bible

Zab 92

¹Kirungi kusiima MUKAMA, kukugiza ibara ly'ogu anyakuli haiguru muno,

²Omu bwire bwa nyenkya, kurangirra engonzi zawe ezitayuga, ekiro kusubirra obwesige bwawe,

³nituzina, nitusuna emigoye y'endongo nituteera n'enanga.

⁴Ai MUKAMA, habwokuba emirimo yawe niyo wansemeriize; ebi wahikiriize, bindeetera omuhimbo.

⁵Ai MUKAMA, emirimo yawe ka y'ekitiinisa! Ebiteekerezo byawe, bihamire muno, tikisoboka itwe kubyetegereza.

⁶Omuntu entaami tasobora kumanya; kinu omuntu omudoma tasobora kukyetegereza:

⁷ekirukugamba kiti, ababi noobu baraaba baaruka nk'obunyansi, enkozi z'ebibi zoona zitunga omugisa, baitu bakategekerwa kimu kyonka, nukwo kuhwerekerra okw'ebiro n'ebiro

⁸Ai MUKAMA, baitu iwe oli haiguru muno ebiro byona

⁹Habwokuba, Ai MUKAMA, orole abanyanzigwa bawe nkooku balihwerekerra, enkozi z'ebibi zoona nkooku balirarangibwa.

¹⁰Baitu nyowe, okampa amaani nk'ag'enimi y'embogo ey'omwirungu okanseesaho amagita ag'entoijo.

¹¹Amaiso gange garozire okugwa kw'abanyanzigwa bange, amatu gange gaahurra okuhwerekerra kw'abaseesi bange abanseesiraga kunkora akabi.

¹²Abarungi balijumba nk'omukindo, kandi balikura nk'omukogoto ogwa Lebbanooni.

¹³Bakabyarwa omunju ya MUKAMA, balikurra omu bikaali bya Ruhanga waitu.

¹⁴Noobu baraaba bakuzire, nibakyazaara, bakyarumu obuhyaka kandi nibasangwamu obuto;

¹⁵okwoleka MUKAMA nkooku ali Muhikiriire, omwandara gwange ogu nkooku atarumu nsobi n'emu.