Read Runyoro - rutooro Zab 96 Bible Online

Zab 96 - Runyoro - rutooro bible

Zab 96

¹Muzinire MUKAMA ekizina ekihyaka; zinira MUKAMA, iwe ensi yoona!

²Muzinire MUKAMA, mukugize ibara lye; buli kiro musubirrege ha kujuna kwe;

³Mumanyiseege ekitiinisa kye omu mahanga, musoborrege abantu boona emirimo ye enyakuhuniriza!

⁴Habwokuba MUKAMA w'ekitiinisa, kandi w'okukugizibwa muno; w'okutiinwa okukira ba ruhanga boona.

⁵Habwokuba ba ruhanga boona ab'amahanga, bisisani; baitu MUKAMA wenka, nuwe yahangire iguru.

⁶Aina ekitiinisa n'oburungi! Omu kiikaro kye ekirukwera, harumu obusobozi n'okusemera.

⁷Muhe MUKAMA, inywe enganda ez'amahanga, muhe MUKAMA ekitiinisa n'obusobozi.

⁸Muhe MUKAMA ekitiinisa ekihikire ibara lye; muleete ekihongwa, mutaahe omu bikaali bye.

⁹Muramye MUKAMA omu kitiinisa kye ekingi ekirukwera; iwe ensi yoona tukumira omumaiso.

¹⁰Mugambire amahanga muti, “MUKAMA ahangiriize! Ensi yoona akagigumya tesobora kutengeeta; amahanga goona aligacwera omusango omu bwinganiza mali.”

¹¹Iguru liniiniirwe, kandi ensi yoona ekyanganuke; enyanja na byona ebinyakugirumu, bihinde;

¹²obwerre na byona ebinyakuburumu, byebuge! Obu, emiti yoona ey'omukibira, nubwo erizinisibwa omuhimbo.

¹³Omumaiso ga MUKAMA, habwokuba naija, habwokuba naija kucwera ensi omusango, kucwera ensi yoona omusango n'obwinganiza, kucwera amahanga omusango n'amananu ge.