Read Runyoro - rutooro Nfu 1 Bible Online

Nfu 1 - Runyoro - rutooro bible

Nfu 1

¹Zinu nizo enfumo za Solomooni, mutabani wa Daudi, omukama wa Isirairi:

²nizo ziraakonyera abantu okumanya amagezi n'okuhaburwa, okwetegereza ebigambo eby'amagezi,

³oikirizeege okuhaburwa, nukwo okole eby'amagezi, eby'obuhikiriire, eby'obwinganiza kandi eby'amananu;

⁴abataina magezi maingi nukwo batunge amagezi, abasigazi batunge okwetegereza n'okwegendereza

⁵abantu ab'amagezi, nabo bahurre beeyongere okwega kandi omuntu omwetegereza ayeyongere amagezi

⁶nukwo akenge orufumo n'amakuru gaarwo, ayetegereze ebigambo eby'abanyamagezi, n'ebikoikyo.

⁷okutiina MUKAMA, niyo entandiko y'amagezi; abadoma, bagaya amagezi n'okuhaburwa.

⁸Mwana wange, ohurrege sso ebi akuhabura, kandi otalyanga, nyoko eky'akwegesa;

⁹habwokuba ebi, nibyo biriba kondo enyakusemiire ey'oraajwaraga ha mutwe gwawe, kandi niyo eraabaga mikuufu ey'oraajwara omu bikya.

¹⁰Mwana wange, abasiisi obu barakusoonasoonaga, otaliboorobera.

¹¹Kakuba bakugamba bati: “Ija tugende hamu, tuserre omuntu tumwite, tweserekerre abantu abataina kabi, otaliikiriza.

¹²Kakuba nibakugamba bati: Tubamirre kimu bali boomeezi kandi bahikiriire, nka Nyabuyonga oku ekora, basisane nk'abo abanyakugenda mu Kiina.

¹³Obu balikugamba bati: Ebintu byona eby'omuhendo, tunyage twijuze amaju gaitu;

¹⁴ija tugende hamu, byona ebi turaiba turaabibagana”

¹⁵mwana wange, otaliteera nabo ekisimba, obeecwehoga;

¹⁶habwokuba, barahuka bwango okukora ekibi, kandi banguha kuseesa esagama.

¹⁷Habwokuba, tikiina mugaso kutega akatimba, kandi kunu, ekinyonyi orukwenda kukwasa kikuroleriire.

¹⁸Baitu abantu nkaabo nibeetega omutego boonka, omutego ogu nugwo gulibaita.

¹⁹Abantu boona abanyakutunga ebintu eby'obuhoogozi, nukwo baba bati, ebintu eby'obuhoogozi biita rubihoogora.

²⁰Amagezi atokera haiguru omu ruguudo; kandi aimukiza omu butale iraka lye;

²¹ayamiriirra ha bisiika eruguru, abaliza ha ntaaho y'amalembo g'orubuga ati:

²²“Basema inywe, mulihikya nkaha, kugonza kwikara n'obusema bwanyu? Abasekerezi, balihikya nkaha kugonza okusekereza kwabo, kandi abadoma balihikya nkaha kugaya amagezi?

²³Muhurre ebi ndukubahana, ndibatamu ebiteekerezo byange; ndibamanyisa ebigambo byange.

²⁴Habwokuba, nkabeeta timwampurra, nkabategera emikono, baitu busaho ayanfiireho.

²⁵Mukagaya amagezi nabahaire, kandi mutannyikirize kubahana.

²⁶Nanyowe ndiseka mu kasumi ak'omuhito gwanyu, nditera enaku okutiina kwanyu obu kuliija.

²⁷Obu mulihikwaho obutiini nkooku haija ihunga, obu mulihikwaho omuhito nk'akairiringwa, obu mulihikwaho enaku n'obujune ndibasekereza.

²⁸Obu nubwo mulinnyeta, baitu tindibagarukamu, nubwo mulinserra muno, baitu timulinzoora.

²⁹Habwokuba, mukanoba amagezi, kandi mutagonze kutiina MUKAMA.

³⁰Mutagonze mbahabule naakake, mukagayira kimu byona ebi nabahanire.

³¹Habweki nu, mulirya ebijuma by'engeso zaanyu kandi eki musemeriire, mwigute muno amagezi gaanyu goonyini.

³²Habwokuba, abasema baitwa okwehugura kwabo, kandi abadoma bahwerekerezibwa okwegonza kwabo;

³³baitu weena anyakumpurra aliikara n'obusinge, ateekaine kandi hataroho na kimu ekirukumutiinisa.”