Read Runyoro - rutooro Nfu 10 Bible Online

Nfu 10 - Runyoro - rutooro bible

Nfu 10

¹Zinu nizo enfumo za Solomooni: Omwana w'amagezi, asemeza ise, baitu omwana omudoma, asaaliza nyina.

²Itungo eriruga omu bubi, tirigasa, baitu obuhikiriire, bujuna omu kufa.

³MUKAMA taleka abahikiriire kurumwa enjara, baitu aima ababi ebi barukugonza.

⁴Omuntu omugara ayereetera obunaku, baitu omuntu omwekambi nuwe atunga.

⁵Omwana anyakugesa omu kyanda, nuwe omwegendereza, baitu omwana anyakugwijagira omu kasumi k'igesa, aswaza.

⁶Abahikiriire, baheebwa omugisa, akanwa k'abantu ababi, kasereka obubi.

⁷Okwijuka omuhikiriire, kuleeta omugisa baitu ababi balyeba bwango.

⁸Ab'omutima ogw'amagezi, nubo balikwata ebiragiro, baitu omudoma anyakwikara naagambisibwa, alihwerekerra.

⁹Ogu anyakukora ebirungi, aba n'obusinge, baitu ogu anyakwikara naahabahaba, alizonzorwa.

¹⁰Anyakwitira omuntu eriiso, aleeta akabi baitu ogu anyakuhana burole, nuwe kaleetabusinge.

¹¹Akanwa k'omuhikiriire, eba nsoro y'obwomeezi, baitu ak'omuntu omubi, kasereka obubi.

¹²Enobi, ezaara empaka, baitu engonzi, iswekerra ensobi zoona.

¹³Abantu ab'amagezi, babaza eby'amagezi, baitu abadoma, beetaaga kukwatirwa omwigo bakaterwa.

¹⁴Abantu ab'amagezi bamanya byona ebi basobora kumanya, baitu embaza ey'obudoma, eraaliza okuhwerekerra.

¹⁵Itungo ery'omuntu omuguuda, nurwo orubuga rwe orw'amaani; obunaku bw'abanaku, nukwo kuhwerekerra kwabo.

¹⁶Empeera enyakuheebwa abakora ebirungi nubwo obwomeezi, baitu amagoba g'abakora ebibi, nukwo kuhwerekera.

¹⁷Ogu anyakwikiriza kuhaburwa, nuwe akwasire omuhanda ogunyakutwara omu bwomeezi, baitu anyakwanga kuhaburwa, asobya.

¹⁸Omuntu anyakusereka enobi ye aba mubiihi w'ebisuba kandi ogu anyakwikaliza kuhangiirra, aba mudoma.

¹⁹Omuntu obu abaza ebigambo bingi, tikisoboka kutakwatwa kibi, baitu ogu anyakulinda orulimi rwe, nuwe aba mwegendereza.

²⁰Orulimi rw'omuntu omurungi, niyo efeeza etongoirwe, ebiteekerezo by'omuntu omubi, tibigira mugaso.

²¹Ebigambo by'omuntu omurungi, birigasira abantu baingi, baitu abadoma, baitwa obudoma bwabo.

²²Omugisa gwa MUKAMA, nugwo gutungisa abantu, kandi tagwongeraho bujune.

²³Omudoma okukora ekibi agweta muzaano, baitu okusemererwa kw'omuntu omwetegereza, nukwo kukora eby'amagezi.

²⁴Omubi eky'atiina, nikyo kirimuhikaho, baitu abahikiriire, baliheebwa eki barukugonza.

²⁵Ihunga obu liteera, ababi bahwaho, baitu abahikiriire baikaraho bagumire, ebiro n'ebiro.

²⁶Nk'enkenku oku etanura omu kanwa, rundi nk'omwika oku gusarra omumaiso n'omuntu gaterra, nukwo aba ati, hali abo abanyakumutuma.

²⁷Okutiina MUKAMA kuleeta okuhangaara, baitu emyaka y'ababi ericwibwaho.

²⁸Okunihira kw'abahikiriire, hanyuma, kulibarugiramu okusemererwa, baitu ababi eki banihira, tibakitunga.

²⁹MUKAMA aba bugumizo, hali abo abakora eby'agonza, baitu ahwerekereza enkozi z'ebibi.

³⁰Ebiro byona, abahikiriire tibaliihururwa, baitu ababi, tibaliikara omunsi.

³¹Abahikiriire, babaza eby'amagezi, baitu orulimi rw'abanyakubaza eby'obucwangya, rulikonwa.

³²Akanwa k'omuhikiriire kagamba ebisemeriire kugambwa, baitu ak'ababi, kabaza eby'obutereenganiza.