Read Runyoro - rutooro Nfu 11 Bible Online

Nfu 11 - Runyoro - rutooro bible

Nfu 11

¹Minzaani etali y'amazima, MUKAMA aginoba muno, ibaale ery'okulengesa ery'amazima niryo agonza.

²Hanyuma y'amarara, hakurataho ensoni, baitu omu kwebundaaza harumu amagezi.

³Obwesigwa bw'abamananu bubebembera, baitu obuteesigwa bw'encwangya, nubwo buzihwerekereza.

⁴Ha kiro eky'ekiniga, obuguuda tibuligira eki buligasa, baitu obugobya bw'encwangya bulizihwerekereza.

⁵Obuhikiriire bw'omuntu ataina kamogo butereekereza omuhanda gwe, baitu omubi, atabaijuka habw'obubi bwe.

⁶Okuhikirra kw'abamananu kubajuna, baitu abacwangya balibohwa omukoijo gwabo.

⁷Omubi obwafa, okunihira kuhwaho, ebitekerezo byogu atamanyire Ruhanga bihwerekerra.

⁸Omuhikiriire, ataburwa akabi omubi nuwe agwa omu kabi.

⁹Omuntu ataikiriza Ruhanga, asobora kuhwerekereza omutaahi n'akanwa ke, baitu abahikiriire bajunwa amagezi.

¹⁰Abahikiriire obu baba n'obusinge, orubuga rugira omuhimbo, kandi abantu ababi obu bafa, abantu bateera akoogo habw'okusemererwa.

¹¹Omugisa gw'abarungi guleetera orubuga okunyumizibwa, baitu akanwa k'ababi, karuleetera kuhwerekerra.

¹²Anyakufurungura omutaahi, ogu aba ataina magezi, omuntu omwetegereza, tagambagambisibwa.

¹³Omuntu engambigambi, ajonjogorwa baitu omwesigwa, kyona eky'ahurra akimira.

¹⁴Ihanga eritaina muhabuzi, ligwa, baitu omu bahanuuzi baingi harumu obusinge.

¹⁵Omuntu anyakwemera omunyaihanga, eki alikyeyijukya baitu atagonza obwemi, aba n'obusinge.

¹⁶Omukazi omunyambabazi aheebwa ekitiinisa, kandi abasaija abakwasa maani, batuunga.

¹⁷Omusaija ow'embabazi, embabazi ze imugasira baitu ow'omwaga, ayesaaliza wenka.

¹⁸Omuntu omubi, atunga empeera etamusemeriire, baitu anyakwoleka nkooku ali muhikiriire, nuwe atunga empeera ey'amazima.

¹⁹Ogu anyakugumiire kimu omu buhikiriire, alyomeera, baitu anyakwemarra ha bubi, alifa.

²⁰MUKAMA anoba abantu abateekereza ebibi, baitu agonza abakora ebirungi.

²¹Omanyire kimu, omuntu omubi nkooku ataligurukwa kifubiro, baitu abahikiriire nubo, abo balijunwa.

²²Omukazi enyamibwa baitu atarukwerinda, asisana nk'empeta ey'ezaabbu eyatairwe omu nyindo y'empunu.

²³Abahikiriire ebi bagonza, hanyuma, bibaleetera ebirungi, baitu ababi ebi banihira, bibarugiramu kubakwatirwa ekiniga.

²⁴Haroho omuntu anyakugaba n'omutima gumu, kandi eki, kimwongera obuguuda, ondi ayanga kulekera eki yaakugabire, kandi ogu nuwe ahwerwa ebintu.

²⁵Omwenda, aliguudahara, kandi n'ogu anyakwitirra abantu amaizi, na uwe aliitirirwa.

²⁶Abantu, bakyena omuntu anyakusereka ebyokulya atunge amagoba amaingi, baitu ogu anyakubibaguza, aheebwa omugisa.

²⁷Ogu akwekambira kuserra oburungi, aba naaserra kugirirwa embabazi, baitu ogu anyakuserra obubi, bumuhikahokwo.

²⁸Ogu anyakwesiga ituungo lye, alihotoka, aliragalika nk'ebikoora eby'omu mwaka gwa kasambura, baitu omuhikiriire aliikara naategizira nk'ekikoora ekibisi.

²⁹Omusaija anyakukwata kubi abantu be, hanyuma, taligira eki atunga, abantu abadoma, ebiro byona baratungwaga abamagezi.

³⁰Obuhikiriire buzaara obwomeezi, baitu obubi bubucwekereza.

³¹Abantu abahikiriire obu baraaba baheebwa empeera yabo omunsi munu, habweki omanyire kimu, ababi n'enkozi z'ebibi, nkooku balifubirwa.