Read Runyoro - rutooro Nfu 13 Bible Online

Nfu 13 - Runyoro - rutooro bible

Nfu 13

¹Omwana ow'amagezi, ahurra ise eky'arukumuhabura, baitu ow'emigayo, taikiriza ebi bamuhana.

²Omuntu omurungi, ebigambo eby'abaza bimurugiramu ebirungi, baitu encwangya, ziikaza omutima ha kukatura.

³Ogu anyakulinda orulimi rwe, alinda obwomeezi bwe; baitu anyakwikara naajonjogorwa, ahwerekerra.

⁴Gateerra aikara naagamba kandi tagira eky'atunga, baitu entoratoozi, atunga atungurra.

⁵Omuntu omuhikiriire, tayenda bisuba, baitu omubi, akora ebihemura kandi ebiswaza.

⁶Obuhikiriire, bulinda omuntu ataina kabi, baitu ekibi kihwerekereza ababi.

⁷Haroho omuntu anyakweyeta muguuda, kandi kunu taina kantu; ondi ayeyeta munaku kandi kunu muguuda malimali.

⁸Omuguuda akozesa sente kujuna obwoomezi bwe baitu busaho n'omu atiinisiriza omunaku.

⁹Abahikiriire, basisana nk'etaara erukwaka kurungi, baitu ababi basisana etaara erukwaka nezimiirra.

¹⁰Emyehembo tezaara kindi kyona, kwihaho enaku, ekikira kuba ky'amagezi, nukwo kuhaburwa.

¹¹Itungo eriija bwango lihwerra baitu anyakutunga mporampora, itungo lye ligenda niryeyongera.

¹²Okunihira ekitaabeho kurwaza ekimasa baitu ekyeegombwa kikahikirra nugwo omuti gw'obwomezi.

¹³Omuntu anyakugaya kuhaburwa, ayehwerekereza wenka, baitu anyakukwata, ekiragiro aliheebwa empeera.

¹⁴Enyegesa y'abantu ab'amagezi, nsoro y'obwomeezi, ehabura omuntu, okwetantara emitego y'orufu.

¹⁵Kutekereza kurungi kuleeta embabazi: baitu omuhanda ogw'abahyangya nukwo kuhwerekerra.

¹⁶Omuntu omwegendereza, ebintu byona abikoza amagezi, baitu omudoma uwe, ahaisiriza obudoma bwe.

¹⁷Omukwenda omubi, anaga abantu omu kabi, baitu engabwa erukwesigwa etereekereza kurungi ebintu byona.

¹⁸Omuntu anyakugaya kuhaburwa, aizirwa obunaku n'ekihemu, baitu anyakuhurra ebi bamuhana, aheebwa ekitiinisa.

¹⁹Omuntu, kutunga eky'arukugonza, kimusemeza baitu abadoma, tibenda kuruga omu bubi.

²⁰Omuntu anyakuteerana n'abantu ab'amagezi, na uwe aba mugezi, baitu anyakwetaba n'abadoma, aligwerwa akabi.

²¹Abasiisi hoona ha bakagenda baizirwa akabi, baitu abahikiriire, baliheebwa ebintu ebirungi.

²²Omuntu omurungi alitunga ebintu eby'aligwetera abaijukuru, baitu ituungo ly'abasiisi, liritwarwa abahikiriire.

²³Omu misiri y'abanaku, heeramu ebyokulya bingi, baitu habwokutabaho obwinganiza, bibaihwaho.

²⁴Atakwata akaigo, akafubira omwana we, ogu, aba omunobere, baitu arukumugonza ayekamba kumworoora.

²⁵Abahikiriire bagira ebyokulya ebirukumara kulya bakaiguta, baitu ababi, nukwo bakaikara nibarumwa enjara.