Read Runyoro - rutooro Nfu 14 Bible Online

Nfu 14 - Runyoro - rutooro bible

Nfu 14

¹Magezi ayombeka enju ye, baitu butaami agiseesa nengaroze wenka.

²Omuntu anyakukora ebirungi, ogu nuwe atiina MUKAMA, baitu anyakukora ebibi, ogu agaya MUKAMA.

³Orubazo rw'omudomadoma mwigo ha mabega ge, baitu ab'amagezi ebi bagamba nibyo bibajuna.

⁴Nambere habura enimi ey'okukurra tolyeza ngano; amani g'ente, nigo gasoboza omuntu kweza ebyokulya bingi.

⁵Kaiso ow'amazima tabiiha bisuba, baitu kaiso ow'ebisuba, abaza ebisuba.

⁶Ow'emigayo aserra amagezi baitu tagabona, baitu enyetegereza, amagezi gagyanguhira.

⁷Oyecwehoga omudoma, habwokuba taina kigambo ky'amagezi ekyasobora kukwegesa.

⁸Amagezi ag'omuntu omwetegereza, gamuhabura omuhanda, baitu obudoma bw'abadoma, bubahabisa.

⁹Ruhanga agaya ababi, baitu ab'omutima omurungi abagirra embabazi.

¹⁰Omuntu, obujune bwe, abumanya wenka, kandi busaho muntu ondi, amanya okusemererwa kwe.

¹¹Eheema y'abantu ababi erihwerekerra, baitu eheema ey'abarungi eriikara neeteta.

¹²Habaho omuhanda omuntu ogu ateekereza ati murungi, baitu hanyuma, gumutwara omu kufa.

¹³N'omunseko omutima gutuntura, baitu okusemererwa obu kuhwaho, hakurataho obujune.

¹⁴Abantu ababi, balitunga ebibasemeriire. Omuntu omurungi, nawe ha bw'ebirungi ebi akozire, alisasurwa.

¹⁵Omusema, aikiriza kyona eki bamugambiire, baitu omuntu omwekengi, arora nambere arubata.

¹⁶Omuntu ow'amagezi ayekengera, kandi afuuhya obubi, baitu omudoma, taganya kandi akora bugubugu.

¹⁷Omuntu anyakukwatwa bwango ekiniga, akora eby'obudoma, baitu omwegendereza, agumiisiriza.

¹⁸Abantu abadoma batunga ebisemeriire obudoma bwabo, baitu ab'amagezi, baheebwa empeera ey'okumanya.

¹⁹Ababi baliinamira abarungi, kandi baliinama omu malembo g'abahikiriire.

²⁰Omunaku, anobwa abantu boona nobwakubaire omutaahi, baitu omuguuda, agira enganjani nyingi.

²¹Omuntu anyakugaya omutaahi, ogu akora ekibi, baitu muhiirwa ogu, anyakugirra abanaku embabazi.

²²Abacika okukora obubi, abo tibasobya? Abo abategeka kukora ebirungi, balikolerwa eby'amazima kandi eby'embabazi.

²³Butoosa, kukora n'amani kuleeta amagoba baitu kwikaliza orugambo rwonka, kuzaara obunaku.

²⁴Ekondo y'abanyamagezi, nugo amagezi gaabo, baitu obudoma, niryo ihunde ly'abadoma.

²⁵Kaiso w'amananu, ajuna abantu, baitu anyakubaza ebisuba, aba mugobya.

²⁶Omuntu anyakutiina MUKAMA, agira obwesige obugumire, kandi abaana be baligira obwirukiro.

²⁷Okutiina MUKAMA niyo nsoro y'obwomeezi eki, nikyo kiretera omuntu kwetantara emitego y'orufu.

²⁸Ekitiinisa ky'omukama kirugirra ha bwingi bw'abantu abaalema, obu ataba n'abantu, tamanywa.

²⁹Omuntu atabiihirwa bwango, ogu nuwe kalimagezi, baitu anyakubiihirwa bwango, ogu nuwe omudoma nyakabara.

³⁰Omutima ogugwagwaine nugwo gwomeeza omubiri, baitu okwegomba, niyo ekookoro kajuunza magufa.

³¹Omuntu anyakubonesa omunaku, ajuma Ogu ayamuhangire, baitu ogu, anyakugirra embabazi omuseege, atamu ekitiinisa ayamuhangire.

³²Ababi, bahwerekerezibwa ebibi ebi bakora, baitu abahikiriire ebirungi ebi bakora bibazorra obwirukiro.

³³Amagezi, gaba omu mutima gw'omuntu omwetegereza, baitu abadoma tibagamanya.

³⁴Obuhikiriire nubwo bukuza ihanga, baitu ekibi, kigayisa abantu boona.

³⁵Omuheereza anyakukora eby'amagezi, asiimwa mukama we, baitu anyakukora ebiswaza, omukwatirwa ekiniga.