Read Runyoro - rutooro Nfu 15 Bible Online

Nfu 15 - Runyoro - rutooro bible

Nfu 15

¹Kugarukamu ebirukworoba kumaraho, baitu ekigambo eky'obukaya kitumbya ekiniga.

²Orulimi rw'abanyamagezi, rugamba amagezi baitu akanwa k'abadoma kagamba eby'obudoma.

³MUKAMA, arora kyona ekinyakubaho buli hantu, atwikazaaho eriiso, obu tuba nitukora ebirungi rundi ebibi.

⁴Orulimi orw'embabazi, muti ogw'obwomeezi, baitu orulimi orunyakubaza eby'ekiniga, nurwo kahendamitima.

⁵Omudoma agaya ise ebi amuhabura, baitu ogu anyakwikiriza kuhanwa, nuwe mwegendereza.

⁶Omunju y'abahikiriire, habamu itungo, itungo ly'ababi, liikara nirituntuzibwa.

⁷Abantu abanyamagezi nubo bararangya amagezi, baitu tigararangibwa badoma.

⁸MUKAMA anoba ekyonzira eky'abantu ababi, baitu agonza esaara ey'abantu abarungi.

⁹MUKAMA, anuga engeso ez'omuntu omubi, baitu agonza ogu, anyakwemarra ha buhikiriire.

¹⁰Obw'olikora ekitahikire, olifubirwa otarukuganyirwa obw'otaliikiriza kugororwa olifa.

¹¹MUKAMA arora Nyabuyonga n'okuzimu, kandi kaaswa emitima y'abantu!

¹²Abanyakwekuliriza, tibenda kuhanwa, tibendera kimu kuhaburwa abarukubakira amagezi.

¹³Omutima ogurumu okusemererwa, gwoleka okusemererwa kwagwo, baitu omutima obu gubamu obujune, omuntu aganya.

¹⁴Omutima gw'omuntu arukwetegereza, guserra kumanya, baitu akanwa k'abadoma, kagonza kubaza eby'obudoma.

¹⁵Obwomeezi bw'omuntu omunaku, kugadagada okutaina ha kugarukira, baitu abantu abaina kusemererwa, obutoosa baikara nibeegonza.

¹⁶Omuntu kimuhikiriire atunge ebike, baitu abe n'okutiina MUKAMA, okukira okutunga ebingi bikamurugiramu akabi.

¹⁷Kirungi kulya doodo baitu haroho engonzi, okukira okulya esajwa baitu haroho enobi.

¹⁸Omuntu omunyakiniga nuwe aimukya empaka, baitu atabiihirwa bwango, aziculeeza.

¹⁹Omuhanda gwa gateerra guhuuka gumerwamu amahwa baitu kandi ogw'entoratoozi liba ikuute eritereekeriire.

²⁰Omwana omwojo omunyamagezi, asemeza ise, baitu omudoma agaya nyina.

²¹Obudoma bugonzibwa abo abadoma, baitu abagezi, bakora ebihikire.

²²Entegeka ezitarumu mpanuura zisoba, baitu obuzigiibwamu abahi b'amagezi baingi, iterekerra.

²³Okugarukamu bwango, kisemeza omuntu, kandi ekigambo ekigambwa omu kasumi koonyini, ka kiba kirungi!

²⁴Omuhanda ogw'omuntu omunyamagezi gutemba gutwara omu bwomeezi, nukwo atabuke Nyabuyonga okuzimu.

²⁵MUKAMA, aseesa enju y'abeemyehembo, baitu alinda emitaano y'omufaakati.

²⁶Ebiteekerezo by'ababi, bibiihiza MUKAMA ebigambo by'abarungi, bimusemeza.

²⁷Omuntu ow'omururu gw'ebintu eby'obunyagi aleetera eka ye akabi, ogu atagonza nguzi, alyoomeera.

²⁸Omuntu omuhikiriire ateekereza nkooku araagarukamu, baitu ababi, bamara gabaza ebintu ebibi.

²⁹MUKAMA ayesungusura ababi, baitu abahikiriire abaha, eki bamusaba.

³⁰Amaiso ag'okusemererwa, gakyanganura omutima gw'omuntu, amakuru amarungi, gagumya amagufa.

³¹Omuntu anyakuhurra arukumuhana ebirungi, aliikara n'abanyamagezi.

³²Ogu anyakugaya kuhaburwa, ayegaya wenka baitu ogu anyakwikiriza kuhaburwa, atunga okwetegereza.

³³Okutiina MUKAMA nukwo okwegesibwa kwonyini kikusemeriire kubanza kwebundaaza, hanyuma, nukwo oheebwe ekitiinisa.