Read Runyoro - rutooro Nfu 16 Bible Online

Nfu 16 - Runyoro - rutooro bible

Nfu 16

¹Omutima gw'omuntu nugwo gutegeka baitu orulimi eki rugarukamu, kiruga hali MUKAMA.

²Ebintu byona omuntu eby'akora, abyeta birungi, baitu MUKAMA, nuwe alenga omutima.

³Omulimo gwawe, ogukwaseege MUKAMA entegeka zaawe nubwo zirihikirra.

⁴Kyona MUKAMA eki yakozire, aina eki yakigenderiiremu, Ego, n'ababi habw'ekiro ky'akabi.

⁵Omuntu weena ow'emyehembo, muziro hali Mukama, onanuke ogu taligurukwa kifubiro.

⁶Obubi bulehererwa embabazi n'amazima, kandi omuntu ekimwehuguza ekibi, nukwo kutiina MUKAMA.

⁷Omuntu obu akora ebisemeza MUKAMA asoboza abanyanzigwa be, kugarukanganamu na uwe.

⁸Kirungi okutunga ebike eby'obwinganiza, okukira okutunga ebingi eby'obuhoogozi.

⁹Omuntu ategeka nambere araagenda, baitu MUKAMA nuwe amuhabura omuhanda.

¹⁰Omukama, agambisibwa obusobozi bwa Ruhanga, eby'acwamu, obutoosa nubwo bihika.

¹¹Minzaani ey'amazima n'endengo ezindi, bya MUKAMA, amabaale goona aganyakuli omu nsahu nuwe yagakozire.

¹²Okukora ekibi, kibiihiza abakama, habwokuba, obwinganiza nubwo bufora obulemi bw'amaani.

¹³Omukama ayenda kuhurra amananu, kandi asiima abantu abagamba amananu.

¹⁴Ekiniga ky'omukama nuwe omukwenda w'orufu, omuntu ow'amagezi, nuwe alikifukyafukya.

¹⁵Omu kumuliikana kw'amaiso g'omukama, harumu obwomeezi, kandi embabazi ze, zisisana ebicu ebinyakunaga enjura ey'obutoigo.

¹⁶Okutunga amagezi, kirungi okukira kutunga ezaabbu; okutunga obwetegereza, nikyetaagwa okukira kutunga efeeza.

¹⁷Okwetantara obubi, niyo ngeso y'abantu abarungi, omuntu anyakwetegereza nambere arukugenda, alinda obwomeezi bwe.

¹⁸Amarara gebembera kuhwerekerra, kandi emyehembo, ereeta kugwa.

¹⁹Nikikira oburungi okuba n'omwoyo ogurukwebundaaza okaikara n'abanaku, okukira okuba omu ha bantu ab'emyehembo n'okubagana ha munyago gwabo.

²⁰Omuntu anyakuta omutima ha kigambo eki yayegesiibwe, atunga omugisa, kandi muhirwa ogu, anyakwesiga MUKAMA.

²¹Omuntu omukuru ow'amagezi, amanyirwa ha bwetegereza bwe ebigambo bye nkooku bisemeza, abantu, na uwe nukwo abatwaliriza ati.

²²Amagezi niryo iziba ery'obwomeezi ha muntu anyakwinago, baitu obudoma, nikyo ekifubiro ky'abadoma.

²³Omutima gw'abantu ab'amagezi, gubasoboza kubaza ebihikire; kandi gubagambisa ebigambo ebirukutwaliriza.

²⁴Ebigambo eby'embabazi, bisisana obwoki bw'enjoki; binurra omwoyo, kandi byoomeeza omubiri.

²⁵Habaho omuhanda, omuntu ogu arora nk'omurungi, ekigendererwa kyagwo, nukwo kumutwara omba kagingo.

²⁶Okunulirwa ebyokulya, nukwo kuhambiriza omuntu okukora muno, enjara enyakumuruma, niyo emwohereza kukora.

²⁷Omuntu omubi, aikara naacika kukora obubi kandi ebigambo eby'abaza, nugwo omurro kasiiriiza.

²⁸Omuntu omubi asaagya empaka, kandi empwehweterezi, eyahurana enganjani nfenanfe.

²⁹Omuntu ow'amaani, alyeryeesa omutaahi, amutomesa omuhanda ogutali murungi.

³⁰Omuntu anyakwita eriiso, ategeka ebintu ebibi, anyakumyora eminwa, azaara akabi.

³¹Omutwe ogumezere enju yekitiinisa; magoba g'obwomeezi bw'okuhikiirra.

³²Omuntu atabiihirwa bwango akira ab'amaani, n'ogu anyakulema obwomeezi bwe, aba murungi okukira anyakuhamba orubuga.

³³Abantu bateera akaruuru, batoma itomo, baitu encwamu yoona, eruga hali Ruhanga.